Техникалық оңалту құралдары

                                       

ҚР Еңбек және халықты әлеуметтік қорғау министрлігі мүгедек адамдарды әлеуметтік қорғау жүйесін жетілдіру бойынша тұрақты негізде жұмыс жүргізуде. Негізгі мақсат адамның нақты қажеттіліктеріне назар аудара отырып, оңалтудың сапасын, қолжетімділігін және тиімділігін арттыру.

Ағымдағы жылдың сәуір айынан бастап ТСР-ды Әлеуметтік қызметтер порталы арқылы қамтамасыз ету тетігіне өзгерістер енгізілді. Негізгі жаңашылдық – ТСР құнын қалыптастыру үдерісінің толық цифрландырылуы, бұл адами факторды толықтай жоюға мүмкіндік берді. Бұрын кепілдендірілген сома әртүрлі дереккөздер (портал, мемлекеттік сатып алу, коммерциялық ұсыныстар) негізінде комиссия арқылы анықталса, енді есептеу Әлеуметтік қызметтер порталы мен электрондық дүкендердің деректері негізінде автоматты түрде жүргізіледі. Бұл:

• баға қалыптастырудың ашықтығын;
• бірыңғай тәсілді;
• бағадағы теңгерімсіздіктерді жоюды қамтамасыз етті.

Іс жүзінде бұл өнімдердің құны енді нақты нарықтық бағаға сәйкес келетінін білдіреді. Мысалы, бұрын 400–500 мың теңге деп бағаланған мүгедектер арбасы бүгінде шамамен 200 мың теңге көлеміндегі нақты құн негізінде есептеледі. Маңызды атап өту керек: бұл азаматтар есебінен үнемдеу емес, негізсіз шығындарды жою. Босатылған қаражат жүйені дамытуға және заманауи, технологиялық оңалту құралдарын сатып алуға бағытталады.

Жаңа тетіктер: ыңғайлылық пен икемділік

Жүйені жаңғырту аясында қосымша қолдау құралдары енгізілуде.

ТСР-ды қайтару тетігі (пилоттық жоба)

Бұл жоба бейінді ғылыми орталық базасында іске қосылады және тек ерікті сипатқа ие. Ол:

• азаматтарды уақытша ТСР-мен қамтамасыз етуге (мысалы, жөндеу кезеңінде);
• қажетті құралдарды жедел алуға мүмкіндік береді.

Бұл ретте:

• тек қауіпсіз қайта пайдалануға болатын ТСР түрлері қолданылады;
• жеке пайдалануға арналған құралдар (протездер, жөргектер және т.б.) бұл тетікке кірмейді;
• барлық құралдар міндетті түрде тексеруден, жөндеуден және санитарлық өңдеуден өтеді.

Нақты қажеттілікке негізделген шешімдер

Қосымша түрде әлеуметтік-техникалық сараптама енгізілуде. Енді ТСР-ды ауыстыру туралы шешімдер формалды мерзімдерге емес, құралдың нақты жағдайы мен адамның қажеттіліктеріне қарай қабылданады. Бұл:

• шешімдердің негізділігін арттыруға;
• алушылардың құқықтарын қорғауға;
• көмекті жедел көрсетуге мүмкіндік береді.

Оңалту қызметтерін дамыту

«Үй жағдайындағы оңалту» жобасы жүзеге асырылуда. Ол бірқатар өңірлерде оң нәтижелер көрсетіп, ағымдағы жылы кеңейтілетін болады.

Реформалардың қорытындысы

Жаңа әлеуметтік қолдау жүйесі қалыптасуда, онда:

• субъективтілік жойылады;
• әділ баға қалыптастыру қамтамасыз етіледі;
• ТСР сапасы артады;
• қызметтерге қолжетімділік жеделдейді;
• заманауи тәсілдер енгізіледі.

Өзгерістердің басты қағидаты – үнемдеу емес, әрбір азамат үшін сапалы, әділ және қолжетімді оңалтуды қамтамасыз ету.