Өз кезегінде Назгүл Сағындықова мүгедек балаларды тәрбиелеп отырған отбасыларды әлеуметтік қолдау шаралары туралы айтты

Еңбек және халықты әлеуметтік қорғау вице-министрі Назгүл Сағындықова ҚР Президенті жанындағы Орталық коммуникациялар қызметінде өткен брифингте мүгедектігі бар балаларды тәрбиелеп отырған отбасыларды әлеуметтік қолдау шаралары туралы айтты.
«Әлеуметтік кодекс шеңберінде 2023 жылдың 1 шілдесінен бастап мүгедектігі бар баланы тәрбиелеп отырған ата-аналарға берілетін мемлекеттік әлеуметтік жәрдемақылардың, арнаулы мемлекеттік жәрдемақылар мен жәрдемақылардың мөлшері орта есеппен 14,5% - ға ұлғайтылатын болады», – деді Н.Сағындықова.
Вице-министр 2023 жылға арналған республикалық бюджетте мүгедектігі бойынша жәрдемақы төлеуге 379 млрд теңге, мүгедектігі бар баланы тәрбиелеп отырған ата-аналарға жәрдемақы мен арнаулы мемлекеттік жәрдемақыға – 71,7 млрд теңге, асыраушысынан айырылу жағдайы бойынша жәрдемақыға – 113,8 млрд теңге көзделгенін атап өтті. Жалпы, 1 шілдеден бастап төлемдер мөлшерін ұлғайтуға республикалық бюджеттен қосымша 41 млрд теңге бөлінді.