Мүгедектікті белгілеу сапасы – басты назарда

Мүгедектікті белгілеу бойынша мемлекеттік қызмет көрсету сапасын арттыру Департаменттің №5 медициналық-әлеуметтік сараптама бөлімінің ұйымдастыруымен өткен жұмыс кеңесінің негізгі тақырыбы болды.

Кездесуге Медеу ауданының алғашқы медициналық-санитарлық көмек ұйымдарының дәрігерлері, медициналық құжаттарды дайындауға және азаматтарды медициналық-әлеуметтік сараптамаға жолдауға жауапты мамандар қатысты.

Кеңес барысында мамандар 2025 жылдағы жұмыс қорытындыларын шығарып, қызмет алушыларды МӘС-ке жолдау көрсеткіштерін талдады. Құжаттарды дұрыс рәсімдеу мәселелеріне ерекше назар аударылды, өйткені бастапқы дайындық сапасы мемлекеттік қызмет көрсету мерзімі мен нәтижесіне тікелей әсер етеді.

Қатысушыларға Қазақстан Республикасы Еңбек және халықты әлеуметтік қорғау министрлігінің мүгедектікті белгілеу тәртібін реттейтін №260, №131, №230 және №283 бұйрықтарының талаптары жан-жақты түсіндірілді.

Кездесудің практикалық бөлігі №031/у нысаны бойынша медициналық құжаттарды рәсімдеу кезінде жиі кездесетін қателіктерді талдауға арналды. Дәрігерлерге олардың алдын алу және медициналық ұйымдар мен МӘС қызметі арасындағы өзара іс-қимылды тиімді ету бойынша нақты ұсынымдар берілді.

Кеңес қорытындысы бойынша мемлекеттік қызмет көрсету сапасын арттыруға және азаматтар үшін неғұрлым қолайлы жағдай жасауға бағытталған жұмысты жетілдіру жөніндегі қосымша шаралар айқындалды.