Сыбайлас жемқорлыққа қарсы іс-қимыл және мемлекеттік қызметшілердің Әдеп кодексін сақтау мәселелері бойынша кездесу өткізілді

2025 жылдың 10 желтоқсанында 2025 жылға арналған сыбайлас жемқорлыққа қарсы іс-қимыл жоспары аясында Қазақстан Республикасы Мемлекеттік қызмет істері агенттігінің Алматы қаласы бойынша департаментінің қызметкерлері Бакыт Канат Бакытұлы және Тұрдуев Шавкет Метхатович департамент ұжымы арасында сыбайлас жемқорлықтың алдын алу және оған қарсы іс-қимыл жасау, сондай-ақ мемлекеттік қызметшілердің қызметтік әдеп талаптарын сақтау мәселелерін талқылауға арналған кездесу өткізді.

Іс-шара барысында Агенттік өкілдері қызметтегі сыбайлас жемқорлықтың алдын алу шаралары, сыбайлас жемқорлыққа қарсы іс-қимыл туралы заңнаманың негізгі талаптары, мүдделер қақтығысын болдырмау тетіктері туралы ақпарат беріп, сыбайлас жемқорлық құқық бұзушылықтар үшін әкімшілік және қылмыстық жауапкершілік нормаларын түсіндірді.

Арнайы назар Қазақстан Республикасының мемлекеттік қызметшілерінің Әдеп кодексін сақтауға аударылды. Бұл кодекс мемлекеттік қызметшілердің кәсіби мінез-құлқы мен адалдық стандарттарын айқындайды және қоғамның мемлекеттік қызметке сенімін арттыруға бағытталған. Қатысушыларға адалдық, бейтараптық, әділдік және азаматтарға құрмет көрсету қағидаларын сақтау маңызды екендігі ескертілді. Әдеп кодексінің талаптарын сақтау мемлекеттік қызметтегі ашықтық пен есептілікті қамтамасыз етуге ықпал етеді.

Кездесу барысында сыбайлас жемқорлыққа қарсы іс-қимыл мәдениетті қалыптастыруға және қызметкерлердің құқықтық сауатын арттыруға бағытталған оқу көрнекілік материалдар көрсетілді.

Жиын қорытындысында қатысушылар өзекті мәселелерді талқылап, сыбайлас жемқорлықтың алдын алу шараларын жетілдіру және қызметтік әдеп мәдениетін нығайту бойынша пікір алмасты.

Өткізілген іс-шара профилактикалық жұмысты күшейтуге, сыбайлас жемқорлыққа қарсы іс-қимыл әрекеттерге «нөлдік төзбеушілік» қағидаларын қалыптастыруға және мемлекеттік қызметшілердің этикалық нормаларды сақтау жауапкершілігін арттыруға ықпал етті.