Медициналық-әлеуметтік сараптама дегеніміз не?

Медициналық-әлеуметтік сараптама дегеніміз не?
Әлеуметтік қорғау органдарына түсетін ең жиі қойылатын сұрақтардың бірі — медициналық-әлеуметтік сараптама дегеніміз не және ол қандай мақсатта жүргізіледі?
Медициналық-әлеуметтік сараптама — бұл мамандар адамның денсаулық жағдайын, ағза функцияларының тұрақты бұзылу дәрежесін және осы бұзылулардың адамның өзіне-өзі қызмет көрсету, жүріп-тұру, еңбек ету, білім алу және қоғамдық өмірге қатысу мүмкіндігіне әсерін бағалайтын мемлекеттік рәсім.
Айта кету керек, медициналық-әлеуметтік сараптаманың негізгі мақсаты диагноз қою емес, ағза функцияларының тұрақты бұзылуынан туындаған тіршілік әрекеті шектеулерінің дәрежесін анықтау болып табылады.
Аурудың болуы өздігінен адамды мүгедектігі бар тұлға деп тануға негіз болмайтынын түсіну маңызды. Шешім медициналық құжаттарды, жүргізілген тексерулер нәтижелерін, емдеу тиімділігін және тіршілік әрекеті шектеулерінің дәрежесін кешенді бағалау нәтижелері бойынша ғана қабылданады.
Медициналық-әлеуметтік сараптамадан өтуге жолдаманы азамат тіркелген жері бойынша медициналық ұйым қажетті тексерулер, диагностика және емдеу шаралары жүргізілгеннен кейін рәсімдейді.
Медициналық-әлеуметтік сараптама нәтижелері бойынша мынадай шешімдер қабылдануы мүмкін:
• мүгедектікті белгілеу және мүгедектік тобын анықтау;
• мүгедектік мерзімін белгілеу;
• мүгедектігі бар адамның жеке оңалту және абилитациялау бағдарламасын әзірлеу;
• немесе заңнамада көзделген негіздер болмаған жағдайда мүгедектікті белгілеуден бас тарту.
Әлеуметтік қорғау департаменті медициналық-әлеуметтік сараптама рәсімі Қазақстан Республикасының заңнама талаптарына сәйкес жүргізілетінін еске салады. Әрбір өтініш жеке қаралып, объективті және жан-жақты бағаланады.