Батыс Қазақстан облысындағы су тасқыны жағдайы туралы ақпарат

Бүгінгі таңда Батыс Қазақстан облысында су тасқынына қарсы іс-шаралар бойынша белсенді жұмыстар жалғасуда.

«Бір тәулік ішінде жұмыстар Орал қаласы мен облыстың 6 ауданында – Бөрлі, Қаратөбе, Шыңғырлау, Сырым, Казталов және Бәйтерек аудандарында жүргізілді, инертті материал салынған қаптар төсеу жұмыстары жалғасуда. Жалпы 6000-ға жуық қап төселді, 84000-ға жуық текше метр су сорылды. Су тасқыны кезеңінің басынан бастап Батыс Қазақстан облысы бойынша инертті материал салынған 32 000 қап төселді, 420 000 текше метр су сорылды. Тартылған күштер мен құралдардың жедел іс-қимылының арқасында бұрын су басқан 57 тұрғын үйден су сору жұмыстары аяқталуда, 100-ден астам адам өз үйлеріне оралуда. Бұрын эвакуацияланған 188 адам туыстарының үйлерінде. Жағдай тұрақты бақылауда. Сонымен қатар, су тасқыны салдарын жою жұмыстары 20 саяжай аумағында жүргізілуде»,-деді Батыс Қазақстан облысы ТЖД бастығының орынбасары Қанат Доспаев.

 Сонымен қатар, өткен тәулікте Сырым, Қаратөбе және Шыңғырлау аудандарында жағдай тұрақтанды, күштер мен құралдар басқа учаскелерге жіберілуде.

 Қазіргі уақытта Орал қаласы аумағында орналасқан Дерқұл және Шаған өзендері арналарындағы су деңгейіне мониторинг жүргізілуде. 11 бақылау гидробекеті қойылды, олардың көрсеткіштері бойынша жедел шешімдер қабылдануда.

 

 

Батыс Қазақстан облысы ТЖД баспасөз қызметі