Құтқару – жүрек таңдауы: Байбұлан Секербаевтың оқиғасы

  Құтқарушылар күні қарсаңында өзгелерге көмек көрсетуді мамандық емес, өмірлік ісіне айналдырған жандар туралы әңгімелейміз. Солардың бірі – Астана қаласы ТЖД жедел-құтқару жасағының бас құтқарушысы Байбұлан Секербаев. Ол 2019 жылдан бері қызмет атқарып, ең күрделі әрі қауіпті жағдайларда адамдарға көмек көрсетіп келеді.

  Байбұлан Секербаев 1990 жылы Қарағанды облысы Нұра ауданының Бірлік ауылында дүниеге келген. Қызмет жылдарында ол көптеген құтқару жұмыстарына, төтенше жағдайлардың салдарын жоюға қатысып, қауіп төнген адамдарға көмек көрсетті. Құтқарушы қызметінде кәсіби дағдылармен қатар, командалық жұмысты үйлестіру, жылдам шешім қабылдау және күрделі жағдайларда сабыр сақтай білу маңызды.

  Байбұлан бірнеше рет күрделі жағдайларда қызмет атқарып, әріптестерімен бірге оқиға орындарына барып, құтқару жұмыстарына қатысқан. Осындай жағдайлардың бірі Астанада орын алған. Сол кезде ол әріптестерімен бірге қыздың өзіне-өзі қол жұмсауына жол бермеді. Ол үшін әрбір шақырту, ең алдымен, адамның өмірі мен қауіпсіздігіне деген жауапкершілік. «Құтқарушы кез келген жағдайға дайын болуы керек. Шақыртуға шыққанда, алда не күтіп тұрғанын ешқашан білмейсің. Бірақ ең бастысы – онда көмекке мұқтаж адам бар екенін білесің», – дейді Байбұлан.

  Қызметтен тыс уақытта үйінде оны отбасы мен төрт баласы күтеді. Олар үшін ол ең алдымен кезекті кезекшіліктен кейін үйіне оралатын әке. Ал қызметте ол қиын сәтте сабырлылық, батылдық танытып, соңына дейін әрекет етуге дайын құтқарушы.