ТЖМ-де жойқын жер сілкінісі кезіндегі мемлекеттік органдардың іс-қимылдары пысықталды

  ТЖМ Стратегиялық жоспарлау және жедел басқару орталығында Алматы қаласында жойқын жер сілкінісі болған жағдайда мемлекеттік органдардың іс-қимылдарын пысықтау бойынша бірлескен оқу-жаттығу өткізілді.

  Оқу-жаттығуға Республикалық жедел штаб құрамына кіретін азаматтық қорғаудың 16 қызметінің өкілдері қатысты. Оқу-жаттығу барысында жойқын жер сілкінісі туындаған кездегі негізгі іс-қимыл алгоритмдері пысықталды. Атап айтқанда, жедел штабты жинау және оның жұмысын ұйымдастыру, жедел ақпаратты беру және алмасу, қалыптасқан жағдайды бағалау, басқарушылық шешімдер қабылдау және төтенше жағдай салдарын жою жөнінде ұсыныстар әзірлеу мәселелеріне назар аударылды.

  Мұндай оқу-жаттығулар ауқымды төтенше жағдай кезінде мемлекеттік органдардың үйлесімді іс-қимылға дайындығын бағалауға, өзара іс-қимыл барысында туындауы мүмкін мәселелерді уақтылы анықтауға және қолданыстағы ден қою алгоритмдерін жетілдіруге мүмкіндік береді.