Ақмола облысы Жарқайың ауданының Костычево ауылында жаңғыртудан кейін 214-ші «Ауыл құтқарушылары» ерікті өртке қарсы құралымы ашылды. Өрт сөндіру бекеті ең жақын мемлекеттік өрт сөндіру бөлімінен 57 шақырым қашықтықта орналасқан және 600-ге жуық тұрғыны бар екі елді мекеннің өрт қауіпсіздігін қамтамасыз етеді.
Жүктелген міндеттерді орындау үшін бөлімше өрт сөндіру автоцистернасымен қамтамасыз етілді. Өрт сөндіру бекеті өрт-техникалық жарақпен, байланыс құралдарымен және қызметтік міндеттерді тиімді орындауға қажетті жабдықтармен толық жабдықталған. Өрт сөндіру автоцистернасы, өрт-техникалық жарақ, байланыс құралдары мен қажетті жабдықтарды Қазақстан Республикасы Төтенше жағдайлар министрлігі табыстады.
Өрт сөндіру бекетінің жеке құрамы тиісті даярлықтан өтіп, тәулік бойы кезекшілік атқаруға толық дайын. Еріктілерді даярлауды облыстық ТЖД мамандары ұйымдастырып, оларды өрт сөндіру техникасы мен жабдықтарын пайдалану, өрт-техникалық жарақты және байланыс құралдарын қолдану, өртті сөндіру тактикасы мен төтенше жағдайларды жою кезіндегі іс-қимылдарға оқытты. Дайындықтан өткен жеке құрам оқиға орнына жедел келіп, өртті бастапқы кезеңде оқшаулау және мемлекеттік өртке қарсы қызмет бөлімшелері келгенге дейін шұғыл әрекет ету міндеттерін орындайды.
Мұндай жобаларды жүзеге асыру шалғайдағы елді мекендердің өрт қауіпсіздігін арттырып, төтенше жағдайларға ден қою уақытын қысқартуға мүмкіндік береді. Бұл ТЖМ-нің ауылдық өрт сөндіру бекеттері желісін дамыту жөніндегі ведомстволық бағдарламасы аясында жүргізіліп жатқан жүйелі жұмыстың бір бөлігі болып табылады.
Қазақстанда 214-ші «Ауыл құтқарушылары» ерікті өртке қарсы құралымы ашылды
