Алматы қаласы мен Алматы облысында мұздақ көлдердің жай-күйін бақылауға арналған биік таулы бақылау бекеттері жұмысын бастады

 Алматы қаласында ТЖМ «Қазселденқорғау» ММ-нің мұздақ көлдердің жай-күйін тәулік бойы бақылауға арналған бес биік таулы бақылау бекеті жұмысын бастады.

  Бақылау бекеттері Үлкен Алматы өзені алабындағы №13-бис және №10 көлдерде, Ақсай өзені алабындағы №8 және №9–10 көлдерде, сондай-ақ «Күмбел» гидробекетінің жоғарғы бөлігінде орналастырылды.

  Маусымдық бақылау бекеттері гидрологиялық жағдайды тұрақты бақылауды қамтамасыз етіп, көлдердің жай-күйіндегі ықтимал өзгерістерді дер кезінде анықтауға және қауіп туындаған жағдайда жедел ақпарат беруге мүмкіндік береді. Мұздақ көлдерге тәулік бойы мониторинг жүргізу сел қаупі кезеңі аяқталғанға дейін жалғасады.

  Бұған дейін осындай биік таулы бақылау бекеттері Алматы облысында да ашылған болатын. Алматы облысында Түрген өзені алабындағы №1, №2 және №5 көлдер, Талғар өзені алабындағы №8 және №19 көлдер, Қаскелең өзені алабындағы №15 көл, сондай-ақ «Большой ключ» гидробекеті (өзеннің жоғарғы ағысында) тәулік бойы бақылауға алынды. Қазіргі уақытта сел қаупі кезеңінде 38 маусымдық бақылау бекеті жұмыс істейді. Бұдан бөлек, сел қаупі бар өзендердің жай-күйін бақылауды 78 тұрақты бақылау бекеті жүзеге асырады.

  Жүргізіліп жатқан іс-шаралар халықтың қауіпсіздігін қамтамасыз етуге және мұздақ көлдердің жарылу қаупіне байланысты төтенше жағдайлардың алдын алуға бағытталған.