Талдықорғандық оқушыларға ашық аспан астында қауіпсіздік сабағы өткізілді

  Талдықорған қаласының орталық жағажайында ашық аспан астында ауқымды қауіпсіздік сабағы өтті. Оған 300–400 оқушы қатысты, бұл күн олар үшін жай ғана экскурсия емес, нағыз практикалық тренингке айналды.

  Жетісу облысы ТЖД құтқарушылары мазмұнды бағдарлама дайындады: техникаларын көрсетіп, өз жұмыстары туралы айтып берді және төтенше жағдайларда қалай әрекет ету керектігін түсіндірді. Балалар тек бақылап қана қоймай, өздері де белсенді қатысты, алғашқы медициналық көмек көрсету дағдыларын меңгеріп, судағы оқиғалар кезінде дұрыс әрекет етуге үйренді.

  Іс-шараның бір бөлігі өрт қауіпсіздігіне арналды. Балаларға өрт шыққан жағдайда өзін қалай ұстау керектігі түсіндіріліп, арнайы құрал-жабдықтар көрсетілді және өрт сөндіру техникасымен жақынырақ танысуға мүмкіндік берілді. Өрт сөндіргішті таныстыру оқушылардың ерекше қызығушылығын тудырды, оны қалай пайдалану керектігін және қандай жағдайларда адамның өмірін құтқаруға көмектесетінін көрсетті.

  Әрине, судағы қауіпсіздіктің негізгі ережелері де еске салынды: түнгі уақытта суға түспеу, ересектерсіз суға кірмеу, белгісіз жерлерде сүңгімеу және әрдайым құтқарушылардың нұсқауларын орындау.

  Мұндай профилактикалық іс-шаралар қауіпсіздік мәдениетін қалыптастырудағы маңызды қадам. Себебі балалар қауіпті жағдайда қалай әрекет ету керектігін ерте жастан білсе, болашақта қайғылы жағдайлардың алдын алуға мүмкіндік артады.