Қазақстанда 171-ші «Ауыл құтқарушылары» пункті ашылды

  Абай облысы Ақсуат ауданының Кіндікті ауылында «Ауыл құтқарушылары» жаңа ерікті өртке қарсы құралым бекеті жұмысын бастады. Бұл жоба ауылдық елді мекендердің қауіпсіздік деңгейін арттыруға бағытталған ТЖМ кешенді жоспарының бір бөлігі болып табылады.

  Салтанатты ашылу рәсіміне ТЖД бастығының орынбасары Алексей Штыкель, Ақсуат ауданының әкімі Ерсін Ескендіров, сондай-ақ ауыл тұрғындары қатысты.

  Бекет ғимараты «Бастау» ЖШС басшысы Нұржақып Нұрланның қолдауымен салынды. Қызмет көрсету аймағына Кіндікті және Алғабас ауылдары, сондай-ақ 12-ден астам қыстақ кіреді. Жалпы аумақта 157 тұрғын үй орналасқан, халық саны 599 адамды құрайды.

  Округ аумағында су алу үшін 29 өрт гидранты орнатылды. Бұл өрт болған жағдайда үздіксіз су беруді қамтамасыз етіп, жедел әрекет етуді арттырады және өрт сөндірудің тиімділігін едәуір жақсартады.

  Еріктілердің тәулік бойы кезекшілігін ұйымдастыру үшін тұрмыстық үй-жайлар мен жеке құрамға арналған демалыс бөлмелері көзделген. Сонымен қатар бекет толықтай қажетті техникамен және жабдықтармен: өрт сөндіру автоцистернасымен, өрт-техникалық жарақтандырумен, арнайы қорғаныс киімімен және байланыс құралдарымен қамтылған, бұл оның тұрақты жауынгерлік дайындығын қамтамасыз етеді.