Қазақстанның ТЖМ делегациясы Қытайдағы кәсіпорынға барды

  Қазақстан Республикасы ТЖМ делегациясы Сюйчжоу қаласындағы (Қытай Халық Республикасы) XCMG өрт сөндіру техникасы зауытына барды. Жұмыс сапары барысында олар өндірістік үдеріс, заманауи технологиялық шешімдер және шығарылатын өрт сөндіру және авариялық-құтқару техникасының толық желісімен танысты.

  Практикалық бөлімде ең жоғары биіктігі 101 метр болатын автоиінді көтергішпен көтерілу жүзеге асырылып, оның мүмкіндіктері мен биіктікте жұмыс істеу шарттары сынақтан өткізілді.

  Зауыт 1995 жылы құрылған және 30 жылдан астам уақыт бойы өрт сөндіру техникасын өндіруге маманданған. Жылдық өндірістік қуаты шамамен 700 бірлікті құрайды, ал соңғы үш жылда 2300-ден астам бірлік техника ішкі нарыққа да, экспортқа да жеткізілді.

  Кәсіпорын көтергіш санаттағы өрт сөндіру автомобильдерінің кең үлгілік қатарын шығарады: 32-ден 101 метрге дейінгі автоиінді көтергіштер, 22-ден 65 метрге дейінгі автосатылар, 20-дан 85 метрге дейінгі көбікті көтергіштер, сондай-ақ 21-ден 62 метрге дейінгі CAFS жүйесі бар көбік көтергіштер. Жалпы алғанда техника 19-дан 101 метрге дейінгі биіктік ауқымын қамтиды, бұл әртүрлі күрделілік деңгейіндегі міндеттерді тиімді шешуге мүмкіндік береді.

 Аталған зауытпен отандық өрт сөндіру техникасын өндіруші «Qaz Tehna» ЖШС ынтымақтастық орнатқан, бұл жеке талаптарды ескере отырып техника өндіруге, сондай-ақ заманауи мамандандырылған техниканың технологиялық әлеуетті дамытуға және өндіруді оқшаулауға ықпал етеді.

  Іс-шара қорытындысы бойынша тараптар өрт сөндіру-құтқару техникасын дамыту саласында тәжірибе алмасуды одан әрі жалғастыру перспективаларын талқылады.