Су тасқынына дайындық: жарылыс жұмыстары, мониторинг және алдын алу шаралары
Қазақстанның өңірлерінде көктемгі тасқын кезеңінде елді мекендердің су басуын болдырмау үшін кешенді жұмыстар жүргізілуде. Өзендердегі мұз кептелістеріне қарсы күрестің негізгі әдістерінің бірі бақылаулы жарылыс жұмыстары, олар қауіпті деп саналатын учаскелердегі мұз қалыңдығын бұзу және әлсіретуге бағытталған. Бұл іс-шаралар еріген судың еркін өтуін қамтамасыз етіп, мұз кептелісінің пайда болу қаупін азайтады.
Құтқарушылар мен жергілікті атқарушы органдар су тасқыны кезеңіне дайындық аясында жарылыс жұмыстарын ұйымдастырады және жүргізеді. Жұмыстарды жүргізгеннен кейін құтқарушылар мен жергілікті атқарушы органдардың қызметкерлері өзендердің жай-күйіне тұрақты мониторинг жүргізеді, іс-шаралардың тиімділігін бағалайды және мұздың өтуін бақылайды. Күрт тарылған өзендердің учаскелеріне, арнаның өзгеруіне, сондай-ақ мұз құрылымдардың бұзылуына қауіп төндіретін көпір өткелдеріне ерекше назар аударылады.
Бүгінгі таңда бақыланатын жарылыстар Ақмола, Ақтөбе, Батыс Қазақстан, Шығыс Қазақстан, Солтүстік Қазақстан, Қостанай және Абай облыстарында жүргізілді. Үбі, Қалжыр, Бұқтырма, Ертіс, Ойыл, Ырғыз, Қобда, Елек, Жақсыбай, Шаған, Деркөл, Быковка, Рубежка, Шежін 1, Шежін 2, Өлеңті, Бұлдырты, Шиелі, Утва, Барбастау, Кіші Өзен, Үлкен Өзен, Шыңғырлау, Ақсу, Ащы, Шағалалы, Жабай, Жыланды, Қалқұтан, Қарасу, Аршалы, Есіл, Бақсұқ, Сілеті, Нұра, Қылшақты, Қоңыраулы, Тоғызақ, Қарағайлы, Тауыш, Қабырға өзендерінде 96 жарылыс жасалды. Жарылыс жұмыстарының жалпы ауданы шамамен 242 мың шаршы метрді құрады.
Шығыс Қазақстанда арықтар мен каналдарды қар мен мұздан тазалау жұмыстары белсенді жүргізілуде. ТЖМ 68303 әскери бөлімі 2-құтқару батальонының әскери қызметшілері жергілікті тұрғындармен бірлесіп Алтай ауданының Зубовск және Тұрғысын кенттерінде 1390 метр арықты және 3 су өткізгіш құрылысты тазалады. Өңірдегі су тасқыны жағдайы тұрақты.
Жетісу облысының ТЖД «Қазселденқорғау» ММ филиалымен бірлесіп қар және су тасқыны қаупі бар учаскелерге мониторинг жүргізді. Көксу, Өсек, Қорғас және Кескентерек өзендерінің алаптарын аэровизуалды тексеру кезінде судың еркін ағып жатқаны, мұз кептелістерінің жоқ екені және су деңгейінің орташа көпжылдық көрсеткіштерге сәйкес келетіні анықталды.
Солтүстік Қазақстан облысында су тасқыны кезеңіне дайындық жұмыстары белсенді жүргізілуде. Қызылжар ауданында 7 гидрологиялық бекет жұмыс істейді, су деңгейіне тұрақты бақылау жүргізілуде. Бескөл және Прибрежное ауылдарында бөгендерді реконструкциялау және нығайту жұмыстары жалғасуда, Тепличное ауылында жұмыстар аяқталды. 13 елді мекенде жалпы ұзындығы шамамен 19 км қорғаныш білектері салынды, сондай-ақ ең осал учаскелер қосымша нығайтылуда. Инфрақұрылымдық жобалар да жүзеге асырылуда: көпір өткелі бар Прибрежное ауылына апаратын жолға реконструкция жасалуда, Заречный кентінде жер білегі нығайтылып, айналма су арнасы жаңартылды.
Барлық іс-шаралар тұрғындардың қауіпсіздігін қамтамасыз етуге, су тасқыны салдарын азайтуға және көктемгі кезеңде елді мекендердің су басуын алдын алуға бағытталған.