ТЖМ-де Төтенше жағдайлардың алдын алу және оларды жою жөніндегі ведомствоаралық мемлекеттік комиссияның отырысы өтті
- Төтенше жағдайлар министрлігінде Төтенше жағдайлар вице-министрі генерал-майор Рамиль Камаловтың төрағалығымен Төтенше жағдайлардың алдын алу және оларды жою жөніндегі ведомствоаралық мемлекеттік комиссияның отырысы өтті.
Отырыс бейнеконференциялық байланыс форматында өтті. Оған орталық мемлекеттік органдардың өкілдері, облыстардың, Астана, Алматы және Шымкент қалалары әкімдерінің орынбасарлары, аумақтық төтенше жағдайлар департаменттерінің басшылары, сондай-ақ ТЖМ-нің басшылары мен лауазымды тұлғалары қатысты.
Отырыс барысында 2026 жылғы су тасқыны қаупі бар кезеңге дайындық мәселелері, сондай-ақ көпқабатты тұрғын және әкімшілік ғимараттардың терезелерінен балалардың құлап кету қаупін азайту бойынша жүргізіліп жатқан жұмысты үйлестіру мәселелері қаралды.
Отырыста төтенше жағдайлар, оқу-ағарту, жасанды интеллект және цифрлық даму, сондай-ақ өнеркәсіп және құрылыс министрліктерінің лауазымды тұлғалары баяндама жасады.
Мемлекеттік органдардың су тасқыны қаупі бар кезеңнен өтуге дайындығы мәселелері қаралды. Алдын алу жұмыстарының жай-күйі, құрылыс және пайдалану талаптарының сақталуы, терезе конструкцияларының қауіпсіздігін қамтамасыз ету, соның ішінде балалар көп шоғырланатын нысандардағы қауіпсіздік, сондай-ақ ведомствоаралық өзара іс-қимылды және халықпен ақпараттық-түсіндіру жұмыстарын күшейту қажеттілігі талқыланды.
Отырыс қорытындысы бойынша вице-министр мүдделі мемлекеттік органдар мен ұйымдарға халықтың және ел аумағының қауіпсіздігін арттыруға бағытталған тиісті шаралар қабылдауды тапсырды.