Апаттар медицинасы орталығының қызметкерлері донор болды

  Астана қаласында Қазақстан Республикасы Төтенше жағдай министрлігінің 30 жылдығына орай Апаттар медицинасы орталығының қызметкерлері  «30 игі іс» ведомстволық бастамаға қосылды.

  Медицина қызметкерлері-құтқарушылар Трансфузиология ғылыми-өндірістік орталығында қан тапсырып, донор болды. Елімізде өтіп жатқан «Өмір тамшысы» донорлық марафоны азаматтық қорғау органдары қызметкерлерін біріктіруде. Осы ай басталғалы бері трассалық медициналық-құтқару пункттері мен Ұлттық медициналық үйлестіру орталығының филиалдарынан 200-ден астам қызметкер марафонға қатысты.

  «Біздің мамандар күн сайын адам өмірін құтқарып, тас жолдарда және төтенше жағдайларда алғашқы медициналық көмек көрсетеді. Сондықтан донорлық марафонға қатысу – біз үшін осы миссияның жалғасы. Бұл өмірге аса мұқтаж жандарға үміт сыйлау мүмкіндігі», – деп Апаттар медицинасы орталығында атап өтті.

  Донорлық марафон құтқарушылардың кәсіби борышы мен адамдарға шынайы жанашырлықпен көмектесуге деген ұмтылысын біріктіріп, ТЖМ басты мақсаты – адам өмірі мен денсаулығын қорғау екенін тағы бір мәрте айқындап көрсетті.