«ҚР ТЖМ 30 жылдығы – 30 игі іс»: құтқарушылар қоғам игілігі үшін күш біріктіреді
Қазақстан Республикасы Төтенше жағдайлар министрлігінің 30 жылдығына орай «30 игі іс» мерейтойлық жобасы басталды. Бастама еліміздің барлық өңірлерін қамтып, ТЖМ қызметкерлерінің кәсібилігінің ғана емес, адамгершілігінің де символына айналды. Акция шеңберінде мұқтаж жандарға көмек көрсетуге, қауіпсіздік мәдениетін қалыптастыруға және құтқарушылар мен қоғам арасындағы байланысты нығайтуға бағытталған қайырымдылық, әлеуметтік және профилактикалық іс-шаралар өткізіледі.
Алғашқы бастамалардың бірі «Өмір сыйы» донорлық марафоны болды. Алғашқы донорлар ТЖМ төтенше жағдайларды жою департаментінің қызметкерлері болды. ТЖД бастығы Руслан Қайрақбаев атап өткендей, донорлық – бұл өмірді құтқарудың тағы бір тәсілі, ал құтқарушылар қоғамға үлгі көрсете отырып, бұл іске де атсалысты
Елімізде «Қауіпсіз терезе» акциясы жалғасуда. Оның мақсаты – ата-аналардың балалар қауіпсіздігіне деген назарын арттыру және қайғылы оқиғалардың алдын алу. Алматы қаласы ТЖ департаменті балалардың терезеден құлауын болдырмау мақсатында алдын алу жұмыстарын жүргізуде. Қала әкімдігінің қолдауымен 1 425 блокиратор сатып алынып, олар мұқтаж жандар санатына жататын тұрғындардың үйлеріне орнатылуда. Бүгінгі таңда бұл құрылғылар 465 пәтерде тегін орнатылды. Техникалық шаралардан бөлек, алдын алу жұмыстарына да ерекше көңіл бөлінуде – «Мобильді қауіпсіздік мектебі» жұмыс істейді.
Ұлытау облысында аталған акция аясында шамамен 270 блокиратор орнатылды, сондай-ақ ата-аналармен түсіндіру жұмыстары жүргізілуде. Бұдан бөлек «Қазавиақұтқару» АҚ және Ұлытау облысы ТЖД бірлесіп балалар мен жастар үшін ашық есік күнін ұйымдастырды. Қонақтар әуе құтқарушыларының жұмысымен, әуе кемелерінің мүмкіндіктерімен және ұшқыштардың жауапты кәсібімен танысты. Ұшқыштар мен инженерлер тікұшақтың техникалық ерекшеліктерін көрсетіп, төтенше жағдайлар кезінде адамдарды құтқаруда авиацияның маңызды рөлі туралы айтып берді.
Шығыс Қазақстан облысының құтқарушылары «Мектепке жол» акциясына қатысты. Көпбалалы отбасылардан шыққан 30 оқушыға оқу құралдары салынған мектеп сөмкелері табыс етілді. Шара ТЖД базасында өткізіліп, балаларға өрт сөндіру бөлімінде экскурсия ұйымдастырылып, заманауи техникамен және құтқарушы мамандығының ерекшеліктерімен таныстырылды.
Қарағанды облысының ТЖД ерекше іс-шара ұйымдастырды. Биыл бірінші сыныпқа баратын департамент қызметкерлерінің балаларына мектеп сөмкелері мен қажетті кеңсе заттары табыс етілді. Бұл шара балалар үшін қуанышты сый ғана емес, сондай-ақ танымдық әрі қызықты күн болды. ТЖД қызметкерлері арнайы көрме ұйымдастырып, құтқару техникасы мен заманауи жабдықтарды көрсетті. Балалар құтқарушы мамандығы туралы көбірек біліп, нағыз батырлардың қалай жұмыс істейтінін өз көздерімен көрді.
Астанада жылу беру маусымы қарсаңында ТЖД қызметкерлері волонтерлермен бірлесе отырып, жеке тұрғын секторында профилактикалық рейдтер өткізуде. Олар тұрғын үйлерге улы газ датчиктерін орнатып, мұржаларды тазартып, қауіпсіздік ережелерін үйретуде. Әлеуметтік жағынан осал санаттағы азаматтардың үйлеріне 64 улы газ датчигі орнатылды.
«30 игі іс» жобасының әрқайсысы — қауіпсіздік мәдениетін, әлеуметтік қолдауды және азаматтық жауапкершілікті дамытуға қосқан үлес. Акция жалғасуда. Еліміздің құтқарушылары ерлік — тек төтенше жағдайда жұмыс істеу ғана емес, сондай-ақ күнделікті азаматтардың өмірі мен денсаулығына деген қамқорлық екенін дәлелдеуді жалғастыруда.