ТЖМ құтқарушылары табиғи өрттерді жою бойынша ауқымды бірлескен оқу-жаттығу өткізді

  Ақмола облысының Зеренді ауданында табиғи өрттерді жою бойынша тактикалық-арнайы оқу-жаттығу өтті.

  Оқу-жаттығудың мақсаты – азаматтық қорғау басқармасы органдарының бірлескен іс-қимылдары кезінде барынша нәтижелерге қол жеткізу, азаматтық қорғау мемлекеттік жүйесі қызметтерінің, ерікті өрт сөндіру құралымдарының, орман шаруашылығы мекемелерінің, жергілікті атқарушы органдардың, волонтерлік ұйымдардың дайындығын тексеру.

  Аңыз бойынша әуеден көзбен шолу барысында орман алқабында өрт ошағы анықталды. Шартты өртті сөндіруге алғашқы болып «Көкшетау» мемлекеттік ұлттық табиғи паркінің күштері кірісті. Қалыптасқан жағдайға байланысты Зеренді ауданының гарнизоны қосылды. Жедел штаб құрылып, қосымша күштерді тарту туралы шешім қабылданды. Мәлік Ғабдуллин атындағы Азаматтық қорғау академиясының, аумақтық қорғаныс бригадасы 99265 әскери бөлімінің, жергілікті атқарушы органдары азаматтық қорғау қызметтерінің күштері мен құралдары сұратылды.

  Оқу-жаттығу барысында жедел қызметтердің ден қою алгоритмі пысықталды, байланыс пен хабарландыру жүйесінің ұйымдастырылуы тексерілді.

  Сонымен қатар Зеренді ауылынан халықты эвакуациялау сияқты іс-қимылдар пысықталды. Осы мақсатта шатырлы қалашық құрылып, онда медициналық көмек қызметтері, тамақтану пункттері мен эвакуацияланған азаматтарға арналған жатын орындар орналастырылды.

  Таудан өз бетінше түсе алмаған туристерді құтқаруға «Қазавиақұтқару» АҚ тікұшағы да жұмылдырылды. Іздестіру жұмыстарына ТЖД кинологиялық тобы мен волонтерлер тобы қатысты. Зардап шеккен адам әуе арқылы эвакуацияланды.

  Жедел-құтқару жасағының құтқарушылары көмек шақыру сигналына жедел әрекет етіп, судағы құтқару іс-қимылдарын пысықтады.

  Оқу-жаттығуға жалпы саны 170 адам мен 30 бірлік техника жұмылдырылды. Іс-шара аяқталғаннан кейін штаб отырысы өтіп, онда барлық қызметтердің іс-қимылдары қорытындыланып, тиісті баға берілді.