Заңнамалық жаңалық: құрылыс кезінде өрт қауіпсіздігі талаптарының орындалуын уәкілетті орган бақылайды

  «Азаматтық қорғау туралы» Заңға енгізілген өзгерістердің бірі – құрылыс салушы тапсырыс берушінің салынған объектінің өрт қауіпсіздігі талаптарына сәйкестігі туралы қорытынды беру қағидаларын бекіту туралы қорытындысын алуының міндеттілігі болып табылады.

  Бұл талап адамдар көп жиналатын объектілерге және биіктігі 28 метрден асатын ғимараттарға қолданылады.

  Объектінің өрт қауіпсіздігі талаптарына сәйкестігі туралы қорытынды беруді уәкілетті органның аумақтық органы жүзеге асырады.

  Қабылданған жаңашылдық объектілерді өрт қауіпсіздігі талаптарын бұза отырып пайдалануға енгізу және оларды ары қарай пайдалану жағдайларын болдырмауға бағытталған.

  Объектінің өрт қауіпсіздігі талаптарына сәйкестігі жөніндегі қорытынды беру тәртібі 2025 жылғы 26 тамыздағы №359 Қазақстан Республикасы Төтенше жағдайлар министрінің бұйрығымен бекітіліп, 2025 жылғы 27 тамызда №36695 тіркеу нөмірімен нормативтік құқықтық актілер тізілімінде тіркелген.

  Жаңа функцияны іске асыру 2026 жылғы 1 ақпаннан бастап «Электрондық үкімет» веб-порталы арқылы мемлекеттік қызмет көрсету түрінде электрондық форматта «Е-лицензиялау» мемлекеттік деректер базасында жүзеге асырылатынын атап өту қажет.