Қазақстан құрамасы өрт сөндіру-құтқару спортынан әлем чемпионатында қола жүлдегері атанды

  Ресейдің Саранск қаласында өрт сөндіру-құтқару спортынан жасөспірім ұлдар арасындағы XIV және жасөспірім қыздар арасындағы X әлем чемпионатының соңғы кезеңі аяқталды.

  Жарыстың соңғы күнінде ең әсерлі әрі тартысты сайыстардың бірі — жауынгерлік қанат жаю өтті. Қатысушылардың күш-қайраты мен төзімділігін сынаған бұл сын әлемдік деңгейдегі жоғары бәсекелестікті көрсетті.

  Сонымен қатар чемпионаттың жабылу және марапаттау рәсімі өтті, онда  қорытынды шығарылды.

  Әлемнің ең мықты бес командасы (Беларусь, Болгария, Ресей, Словакия және Қазақстан) арасында өнер көрсеткен Қазақстанның қыздары қайсар мінез танытып, әлем чемпионатының қола жүлдегері атанды.

  Қазақстан құрамасында Аружан Алмұхамбет, Айша Тұрсынбай, Анастасия Бунякина, Лианна Шевцова, Лия Хасипова, Ариана Джуман өнер көрсетті.

  Ұлдар арасындағы сайыс та аса тартысты өтті. Төрт құрама (Беларусь, Ресей, Словакия және Қазақстан) бақ сынаған жарыста қазақстандықтар төртінші орынды иеленді.

  Жалпыкомандалық есепте Қазақстан құрамалары тұрақтылық танытып, жоғары дайындық деңгейін дәлелдеп, қола медальға қол жеткізді.

  Бұл жетістік өрт сөндіру-құтқару спортының Қазақстанда қарқынды дамып келе жатқанын және ұлттық құраманың әлемдік деңгейде өз орнын нығайтып келе жатқанын айқын көрсетті.

  Спортшыларға арналған экипировка мен әлем чемпионатына шығу мүмкіндігі Қазақстандық құтқарушылар қорының көмегімен ұйымдастырылды.