Өз ісіне адал кәсіби маман

Мемлекеттік қызмет жүйесінде қызметін қоғам алдындағы борышы мен жауапкершілігіне айналдырған тұлғалар бар. Солардың бірі – азаматтық қорғау жүйесінің ардагері, Жамбыл облысы Төтенше жағдайлар департаментінің бас маманы, заңгерлік топтың жетекшісі Дүйсенбеков Мырзагали Серікбайұлы.

      Мырзагали Серікбайұлы өз білім жолын Алматы халық шаруашылығы институтында бастап, кейін Ахмет Ясауи атындағы Халықаралық қазақ-түрік университетінде жалғастырды. Бұл оқу орындарынан алған терең білімі оның кәсіби жолының мықты негізіне айналды. Ол төтенше жағдайлар жүйесінде 1996 жылдан бастап еңбек етіп келеді.

     Осы жылдар ішінде азаматтық қорғау саласының әртүрлі бағыттарында жұмыс істей жүріп, ол мол тәжірибе жинақтады. Өз жұмысын терең меңгерген, жүйенің ішкі құрылымын жақсы білетін білікті маман ретінде танылды. Оны ерекшелендіріп тұратын қасиеттер – стратегиялық ойлау қабілеті, жедел талдау жасау және төтенше жағдайлар кезінде заң аясында нақты шешім қабылдай білуі.

     2014 жылдан бері Мырзагали Серікбайұлы Жамбыл облысы ТЖД-нің бас маманы — заңгерлік топтың жетекшісі қызметін атқарып келеді. Осы кезең ішінде ол өзін жауапты, білімді, тәртіпті әрі принципшіл қызметкер ретінде көрсете білді. Құқықтық мәдениеті жоғары, төтенше жағдайлар саласындағы заңнамаларды жетік меңгерген маман ретінде әріптестері арасында зор беделге ие.

     Төтенше жағдайлар жүйесінде заңгерлік сүйемелдеу – тек заңды білумен шектелмейді, сонымен қатар оны нақты, жиі күрделі жағдайда қолдана білу қабілетін де талап етеді. Мырзагали Серікбайұлына тән кәсібилік, объективтілік, ұқыптылық және өзіне деген талапшылдық – оның қызметіне тән басты қасиеттер.

     Ұзақ жылғы адал еңбегі мен жүйеге қосқан үлесі ескеріліп, ол келесі марапаттарға ие болды:

• «Төтенше жағдайлар жүйесінің үздік қызметкері» ІІ және ІІІ дәрежелі төсбелгісі,
• Қазақстан Республикасы Төтенше жағдайлар министрінің алғыс хаты,
• «Қазақстан Республикасы Тәуелсіздігіне 20 жыл» мерейтойлық медалі,
• Қазақстан Республикасы Ішкі істер министрлігінің Төтенше жағдайлар комитетіне 20 жыл» мерейтойлық медалі.

     Бұл марапаттар – оның көп жылғы мінсіз еңбегінің, жоғары жауапкершілігінің және азаматтық қорғау жүйесін дамытуға қосқан үлесінің нақты көрінісі.

       Мемлекеттік қызметші күні қарсаңында Жамбыл облысы Төтенше жағдайлар департаментінің ұжымы Мырзагали Серікбайұлына адал еңбегі, жоғары кәсібилігі және ісіне деген шынайы адалдығы үшін шынайы алғысын білдіреді. Оның еңбегі – жас мамандарға үлгі, мемлекеттік қызметтің тұрақтылығы мен сенімділігінің символы.

 

Жамбыл облысы ТЖД ИЖ және СКТ