Кішкентай арман — үлкен бақыт: Шымкенттік өрт сөндірушілер жас туған күн иесін қуантты

Шымкент қаласы Төтенше жағдайлар департаментінің Instagram желісіндегі Direct парақшасына 4 жасар баланың анасынан жүрек тебірентерлік хабарлама келіп түсті.

Анасы өз хатында ұлының өрт сөндіру қызметіне ерекше қызығатынын жазған. Оның ең сүйікті ойыншықтары — өрт сөндіру көліктері, ал сирена дауысын естісе, өрт сөндірушілердің жұмысын тамашалау үшін бірден терезеге немесе балконға жүгіреді. Құтқарушылар туралы мультфильмдерді қызыға көретін бүлдіршіннің ең үлкен арманы — нағыз өрт сөндіру техникасын жақыннан көріп, құтқарушылармен танысу болатын.

Баланың осы арманы мен жуырда 4 жасқа толғанын білген өрт сөндіру бөлімінің қызметкерлері оның тілегін орындауға шешім қабылдады. Олар кішкентай туған күн иесін бөлімге қонаққа шақырып, арнайы экскурсия ұйымдастырды.

Экскурсия барысында бүлдіршін өрт сөндіру техникасын жақыннан көріп, нағыз өрт сөндіру автокөлігінің кабинасына отырып көрді, арнайы жабдықтармен танысты және құтқарушылармен еркін әңгімелесті. Қызметкерлер оған өз мамандықтарының ерекшеліктері туралы айтып, заманауи техниканың мүмкіндіктерін көрсетті.

Кездесудің ең әсерлі сәттерінің бірі туған күнімен құттықтау болды. Өрт сөндірушілер жас қонаққа естелік сыйлықтар табыстап, зор денсаулық, жарқын әсерлер мен бақытты балалық шақ тіледі.

Бүлдіршіннің шынайы қуанышы мен жүзіндегі бақытты күлкісі қызметкерлер үшін ең үлкен марапатқа айналды. Бұл күн оның жадында ұзақ сақталатын ерекше күн болды және тағы бір мәрте балалар арманының орындалуға тиіс екенін дәлелдеді.

Кейде үлкен бақыт сыйлау үшін кішкентай ғана арманды орындау жеткілікті.