Абайлаңыз, өрт қауіпті кезең!

Шымкентте күннің күрт ысуына байланысты өрт қауіпті маусымы ресми түрде басталды. Төтенше жағдайлар департаменті мен тиісті қызметтер күшейтілген жұмыс режиміне көшіп, қауіпсіздік шараларын қолға алды. Жазғы аптапта құрғақ шөп пен қамыс ең кіші ұшқыннан-ақ тұтанып, үлкен апатқа ұласуы мүмкін. Осыған байланысты мамандар қазіргі таңда қала аумағында ауқымды профилактикалық жұмыстарды бастап кетті.
Алдын алу шаралары: Құтқарушылар не істеп жатыр?
Тілсіз жаудың алдын алу мақсатында ТЖД қызметкерлері келесі бағыттар бойынша жұмыс істеуде:
1.Қауіпті аймақтардағы құрғақ шөп пен қамысты жою;
2.Өрттің таралуына тосқауыл болатын арнайы минералданған жолақтарды (жыртылған жер қабатын) жасау;
3.Тұрғындар арасында рейдтер жүргізіп, қауіпсіздік ережелерін насихаттау.

Орман өрттері станциясының басшысы Асқар Ахметовтың айтуынша, қазіргі уақытта жасыл алқаптарды сақтау басты назарда: «Біз қалалық ТЖД-мен тығыз байланыстамыз. Қауіпті аймақтарда алдын алу жұмыстары толықтай қолға алынды. Біздің басты мақсатымыз — тұрғындардың амандығы мен табиғатты қорғау», — дейді ол.

Ал Шымкент қаласы ТЖД басшысының орынбасары Сергей Огай техникалық дайындық пен өткен жылдың тәжірибесіне тоқталды:«Өткен жылы орман қоры аумағында екі өрт тіркелгенімен, бағымызға орай, ағаштарға зақым келген жоқ. Қазір барлық бөлімшелер мен техника сақадай сай. Алайда, ең тиімді қорғаныс — тұрғындардың жауапкершілігі мен ұқыптылығы екенін ұмытпауымыз керек», — деп атап өтті С. Огай.

Тұрғындар назарына!
Төтенше жағдайлар департаменті қала қонақтары мен тұрғындарына қарапайым қауіпсіздік ережелерін есте сақтауды сұрайды:
1. Құрғақ шөп пен қоқысты өртемеңіз.
2. Табиғат аясында от жаққанда абай болыңыз (немесе мүлдем жақпаңыз).
3. Сөндірілмеген сіріңке немесе темекі тұқылын тастамаңыз.
Есіңізде болсын: Егер өртті немесе түтінді байқасаңыз, дереу 101 немесе 112 нөмірлеріне қоңырау шалыңыз.
Өрт — тілсіз жау. Оның алдын алу — бәрімізге ортақ міндет!