«Көктем–2026» РКШОЖ: Шымкентте су тасқыны қауіпіне қарсы практикалық іс-қимылдар пысықталды

Шымкент қаласында «Көктем–2026» республикалық командалық-штабтық оқу-жаттығуы аясында су тасқыны кезеңіне дайындықты пысықтауға бағытталған кешенді практикалық іс-шаралар өткізілді.

Су тасқыны салдарын жоюға қалалық азаматтық қорғау қызметтерінің 2448 қызметкері, түрлі мақсаттағы 442 бірлік техника, 94 мотопомпа және 6 жүзу құралы дайындыққа келтірілді.

Жаттығу сценарийіне сәйкес, шартты түрде мол жауын-шашын мен қардың еруі салдарынан өзен арналарының бітелуі, су деңгейінің көтерілуі, жасанды арықтардың толуы және автокөлік жолдарын су басу жағдайлары орын алып, тұрғын үйлерге қауіп төнді.

Практикалық кезең барысында:

• өзен арналарының су өткізу қабілетін қалпына келтіру, механикалық тазалау және арнаны бұру жұмыстары жүргізілді;
• жағалауларды нығайту, тереңдету және тазарту арқылы тұрғын үйлерді су басу қаупінің алдын алу шаралары атқарылды;
• су жинақтаушы дамбалардың деңгейін инертті материалдар салынған қаптармен көтеру жұмыстары ұйымдастырылды;
• көпір асты кеңістіктері мен ирригациялық жүйелер тазартылып, зақымданған элементтер қалпына келтірілді;
• автокөлік жолдарына жайылған судың салдарын жою және жол қозғалысын реттеу іс-қимылдары пысықталды.

Сонымен қатар су тасқыны салдарын жою мақсатында басқа өңірлерге инженерлік техникаларды теміржол платформалары арқылы жөнелту алгоритмі іс жүзінде тексерілді.

Практикалық іс-шараларға қаланың азаматтық қорғау қызметтерімен қатар Қорғаныс министрлігі мен Ұлттық ұланның әскери бөлімдері жұмылдырылып, ведомствоаралық өзара іс-қимыл тетіктері нақты жағдайға барынша жақындатылған форматта үйлестірілді.

Оқу-жаттығу көктемгі кезеңдегі ықтимал төтенше жағдайлардың алдын алу және оларды жоюға бағытталған күштер мен құралдардың дайындық деңгейін арттыруға мүмкіндік берді.