Қауіпсіз қыс бүгіннен басталады: ТЖД жеке сектордағы өрттердің алдын алу жұмыстарын күшейтуде

          Павлодар облысында өрт қауіпсіздігі айлығы жалғасып жатыр. Төтенше жағдайлар департаментінің қызметкерлері жергілікті атқарушы органдар, полиция және еріктілермен бірге жеке секторда профилактикалық рейдтер өткізуде.

          2025–2026 жылдардағы жылыту маусымында облыстағы өрттердің негізгі себептерінің бірі — электр жабдықтарын дұрыс орнатпау және пайдалану ережелерін сақтамау. Осы себептен 35 өрт тіркелген. Ал пештерді орнату және пайдалану талаптарының бұзылуынан 25 өрт болған.

          - Рейдтердің басты мақсаты — өрт пен көміртек тотығынан уланудың алдын алу. Үйлерді аралау кезінде мамандар электр сымдарын, пештер мен түтін мұржаларын тексереді. Сондай-ақ пеш алдындағы қорғаныс төсемдерінің болуына, жылыту құралдарының дұрыс жұмыс істеуіне және түтін мен көміртек тотығы датчиктерінің жарамдылығына назар аударады.

Бүгінгі таңда облыста 11 715-тен астам үй араланып, 26 815-тен астам тұрғынға қауіпсіздік ережелері түсіндірілді.

          Әлеуметтік осал отбасыларға ерекше көңіл бөлінеді. ТЖД есебінде осындай отбасылар тұратын 1 105 үй бар. Жергілікті атқарушы органдар мен үкіметтік емес ұйымдардың көмегімен бұл үйлерге 396 көміртек тотығы датчигі орнатылды, - деді Павлодар облысы ТЖД бастығы Рустамбек Амрин.

          Кезекті рейд барысында әлеуметтік осал отбасылардың, оның ішінде көпбалалы отбасылардың үйлеріне 10 көміртек тотығы датчигі орнатылды. Сонымен қатар пештер тазаланып, пеш алдына қорғаныс төсемдері орнатылды.

          ТЖД қызметкерлері профилактикалық жұмыстарды жалғастыруда. Мамандар тұрғындарға пеш пен газ құрылғыларын дұрыс пайдалану, түтін мұржаларын уақытында тазалау және балаларды қараусыз қалдырмау қажеттігін еске салады.

          Қауіпсіздік қарапайым ережелерден басталады. Өрттің алдын алу — әр адамның ортақ міндеті.