ТЖМ қайсар әйелдері: мамандық өмірлік миссияға айналғанда
Қазақстанның ТЖМ жүйесінде күн сайын адамдардың қауіпсіздігін қамтамасыз ететін мыңдаған маман қызмет атқарады. Олардың арасында жұмысы жоғары жауапкершілікті, төзімділік пен жанқиярлықты талап ететін әйелдер ерекше орын алады. Халықаралық әйелдер күні қарсаңында қызметті шынайы өмірлік борышына айналдырған жандар туралы айтамыз.
Азаматтық қорғау сержанты Әсел Жадырасынова Қызылорда облысы ТЖД Арал ауданы ТЖ бөлімінің №3 мамандандырылған өрт сөндіру бөлімінде өрт сөндіруші-радиотелефонист болып қызмет атқарады. Оның міндетіне шақыртуларды қабылдау, дабыл сигналын беру, өрттің нақты мекенжайын анықтау және шұғыл қызметтермен өзара іс-қимылды үйлестіру кіреді. Әсел білікті маман ғана емес, сондай-ақ табысты спортшы. Ол жауынгерлік өрістету және екі сайыс бойынша Қазақстан Республикасы чемпионаттарының күміс жүлдегері, сондай-ақ Сауд Арабиясы Корольдігінде өткен халықаралық жарыстың қола жүлдегері. Бүгінде ол қызметін екі баланы тәрбиелеумен қатар алып жүр.
Жамбабаева Ардақ Қырғызбайқызы ТЖМ «Қазселденқорғау» ММ Алматы қалалық пайдалану-техникалық басқармасының мониторинг және құлақтандыру кезекші қызмет бөлімінде диспетчер болып 17 жыл еңбек етеді. Оның жұмыс орны қателікке де, кідіріс жасауға да жол берілмейтін ақпарат ағынының орталығы. Тәулік бойы жағдайға мониторинг жүргізу, жедел мәліметтерді қабылдау және жеткізу, ақпараттың дұрыстығын бақылау, сондай-ақ өзгерістерге жедел әрекет ету жоғары деңгейдегі зейін мен кәсібилікті талап етеді. Қызмет жылдары ішінде ол ұжымның сенімді тірегіне, әрдайым арқа сүйеуге болатын маманға айналды. Сонымен қатар Ардақ Қырғызбайқызы жауапты қызметін үлкен отбасымен сәтті үйлестіріп келеді. Ол бес баланың анасы.
Павлодар облысында кинологтардың жұмысынсыз құтқару операциялары жүргізілмейді. Павлодар облысы ТЖД жедел-құтқару жасағы кинологиялық бөлімшесінің жетекшісі Галина Куценко 18 жылдан астам уақытын іздестіру-құтқару иттерін даярлауға және қызметке арнады. Бүгінде ол Рада атты жас австралиялық овчаркамен жұмыс істейді. Мұндай иттерді дайындау көпжылдық еңбек пен жұмысқа толық берілуді талап етеді, себебі көбінесе адамның өмірін құтқару кинолог пен оның төрт аяқты көмекшісінің үйлесімді жұмысына байланысты болады.
Азаматтық қорғау сержанты Мөлдір Қуандықова Шымкент қаласы ТЖД Жоспарлау және жедел басқару орталығы Орталық өрт байланыс пунктінің диспетчері болып қызмет атқарады. Салыстырмалы түрде қысқа еңбек өтіліне қарамастан, ол жоғары жүктеме жағдайында жылдам және дәл шешім қабылдай алатын кәсіби маман. 2024 жылы ол қаладағы сауда объектілері мен өндірістік кәсіпорындардағы ірі өрттерді жою кезінде бөлімшелердің әрекеттерін үйлестірді. Қызметтен тыс уақытта да Мөлдір өз міндетіне адал болып қала береді: бірде кезекшіліктен кейін жоғалған қызға көмектесіп, оның қауіпсіздігін қамтамасыз етіп, ақпаратты полицияға жеткізді.
Бұл әйелдердің оқиғалары азаматтық қорғау жүйесінің ұжымының тек бір бөлігі ғана. Олардың кәсібилігі, төзімділігі және қызметке адалдығы күн сайын төтенше жағдайлардың алдын алуға және адамдардың өмірін құтқаруға көмектеседі.