«Секунд барлығын шешеді» іс-шарасы өткізілді

Қазақстан Республикасы Төтенше жағдайлар министрлігінің 30 жылдығына орай ұйымдастырылған «30 игі іс» республикалық бастамасы аясында «Секунд барлығын шешеді» тақырыбында жоспарлы іс-шара өткізілді.

Аталған шараның мақсаты — тұрғындардың төтенше жағдайлар кезіндегі, әсіресе жер сілкінісі жағдайындағы дұрыс іс-қимылдарын қалыптастыру және қауіпсіздік мәдениетін арттыру.

Іс-шара барысында Ақтау қаласы, 19 шағын ауданындағы №28 үйде орналасқан «Альбион» тұрғын үй кешенінің тұрғындары үшін оқу-жаттығу сабақтары ұйымдастырылды. Сабақ кезінде қатысушыларға жер сілкінісі кезінде қауіпсіз орындарға эвакуациялау, алғашқы әрекеттерді дұрыс орындау, құтқару қызметтеріне жедел хабарлау сияқты маңызды тақырыптар түсіндірілді.

Жаттығу барысында тұрғындар практикалық іс-қимылдар жасап, ТЖ саласындағы мамандардан кеңес алды. Шараға Маңғыстау облысының Төтенше жағдайлар қызметкерлері қатысты.

Мұндай іс-шаралар тұрғындардың қауіпсіздікке деген жауапкершілігін арттырып, болашақта төтенше жағдайларға дайын болуға ықпал етеді.

Маңғыстау облысы ТЖД