Ыстық күн басталысымен Қарағанды облысының тұрғындары су қоймаларына демалуға шығады. Облыстың барлық су айдындарында қайғылы оқиғалардың алдын алу үшін күн сайын профилактикалық іс-шаралар өткізіледі.
Жаз мезгілінде ең көп таралған құқық бұзушылықтар жабдықталмаған жерлерде шомылу, спирттік ішімдіктерді ішу, жеке құтқару құралдарынсыз жүзу құралдарында болу болып табылады.
Әкімшілік құқық бұзушылық туралы кодекстің 364-бабына сәйкес тыйым салынған орындарда шомылу, ортақ су пайдалану ережелерін бұзу ескерту жасауға немесе жеке тұлғаларға 2 айлық есептік көрсеткіш мөлшерінде айыппұл салуға әкеп соғады.
ӘҚБтК-нің 440-бабы бойынша алкогольдік ішімдіктерді ішу 5-тен 10 айлық есептік көрсеткішке дейінгі мөлшерде айыппұл салуға әкеп соғады.
Кемелерді, оның ішінде шағын көлемді кемелерді пайдалану ережелерін бұзғаны үшін, сондай-ақ шағын көлемді кемеде жеке құтқару құралдарынсыз болу үшін ӘҚБтК-нің 582-бабына сәйкес 5 АЕК мөлшерінде айыппұл қарастырылған.
ТЖД құтқару бөлімшелері жоғары дайындық жағдайына келтірілді. Бөлімшелер арнайы авариялық-құтқару техникасымен, жүзу құралдарымен, сүңгуір жабдықтарымен және құрал-жабдықтармен жабдықталған.
Су айдынында демалу орындарында болғанда:
- жабдықталмаған жерлерде суға түсуге;
- мас күйінде және есірткіге масайған күйде суға түсуге және шомылуға;
- қайықтардан, катерлерден, өткелдерден, сондай-ақ осы мақсатқа арналмаған құрылыстардан суға секіруге;
- жүзу шегін білдіретін қалтқы белгілерден асуға;
- жүзуге арналмаған заттармен жүзуге;
- су айдындарын ластауға және қоқсытуға;
- жағалауда және киім ауыстыратын орындарда демалушыларды жарақаттауы мүмкін қоқыстарды қалдыруға;
- жалған дабыл беріп айғайлауға;
- техникалық және алдын алу белгілерінің, қалтқы белгілерінің үстіне шығуға;
- балаларға ересектердің қарауынсыз суға кіруге рұқсат етілмейді.
Қарағанды облысы ТЖД баспасөз қызметі