Жан Акжановтың «Семья пожарного» кітабының тұсаукесері

Н.В. Гоголь атындағы Қарағанды облыстық әмбебап ғылыми кітапханасында қазақстандық автор Жан Ақжановтың «Семья пожарного» атты жаңа кітабының таныстырылымы өтті. Шараға Төтенше жағдай департаментінің қызметкерлері мен ардагерлері, мектеп оқушылары қатысты.

Шығарма – барша құтқарушылардың жанұясына арналған жүрекжарды туынды. Автор оқырмандарға кітаптың негізгі идеясын, көтерген тақырыптарын және өрт сөндіруші мамандығының қоғам үшін маңызын жан-жақты таныстырды.

Аталған кітап төтенше жағдай туа қалса тосылмай көмекке келетін құтқарушылардың ерлігі, сондай-ақ, 2022 жылы өзінің ерлігімен көптің есінде қалып, қазасымен қалың қазақтың қабырғасын қайыстырған өрт сөндіруші Асқар Забикулиннің рухына арналған.

Сонымен қатар «Мамандықтар әлеміне саяхат» атты әсерлі фотокөрме ұйымдастырылды. Көрме авторлары – әскери фотограф Айдын Тонтаев пен Александр Марченко жұмысшы мамандық иелерінің жанкешті еңбегін фотошежіре арқылы көрсетті.

Іс-шараға қатысқан «Төтенше жағдайлар органдары ардагерлерінің Қазақстандық ұйымы» филиалының төрағасы Берік Елеуұлы Әбдіраев кітаптың құтқарушылардың өмірі мен олардың жанұяларының рөлін жан-жақты көрсететінін атап өтіп, қоғамдағы мамандықтардың маңыздылығына тоқталды. Кеш жылы атмосферада, мазмұнды әрі әсерлі өтті.