Астанада кәсіби мереке аясында БАҚ өкілдеріне құрмет көрсетілді

ТЖД БАҚ күніне орай журналистерге шұғыл қызметтердің жұмысын жариялағаны және қауіпсіздік мәдениетін насихаттағаны үшін алғыстарын білдіріп, салтанатты іс-шара өткізді.

Іс-шара №3 мамандандырылған өрт сөндіру бөлімінде өтті, оның барысында журналистер елордалық өрт сөндірушілердің жұмыс күндерімен жақынырақ танысты. Кездесу аясында өрт-құтқару спорты бойынша құтқарушылардың күш-қуатын, ептілігі мен кәсібилігін көрсеткен көрме қойылымдары ұйымдастырылды.

Кейін іс-шараға қатысушылар жедел-құтқару жасағына барды. Мұнда әртүрлі төтенше жағдайларды жоюда қолданылатын заманауи техника мен мамандандырылған жабдықтар ұсынылды. Кинологтың қызметтік итпен демонстрациялық қойылымы ерекше қызығушылық тудырды.

Іс-шара соңында ТЖД бастығының орынбасары Әрлен Бүркітбай журналистерге ынтымақтастығы үшін алғыс білдіріп, БАҚ өкілдеріне алғыс хаттар табыс етті.

Мұндай кездесулер құтқарушылар мен журналистік қоғамдастық арасындағы өзара түсіністікті нығайтуға, сондай-ақ халықтың шұғыл қызметтерге деген сенім деңгейін арттыруға ықпал етеді.

 

 

Астана қаласы ТЖД баспасөз қызметі