Өрт қауіпсіздігін қамтамасыз ету бойынша жоспарлы оқу-жаттығулар өткізілді

Өрт қаупі жоғары кезеңге дайындықты арттыру мақсатында КММ «Қаскелең орман шаруашылығы» аумағында өрт қауіпсіздігін қамтамасыз ету бойынша жоспарлы оқу-жаттығулар өткізілді. Іс-шараға Іле ауданының ауылдық округтері әкімдіктерінің қызметкерлері, орман шаруашылығының өкілдері, жедел қызметтер, төтенше жағдайлар қызметі мен ерікті өрт сөндіру жасақтарының өкілдері қатысты.

Оқу-жаттығулардың басты мақсаты – орман өрті болған жағдайда барлық қатысушы құрылымдардың үйлесімді іс-қимылдарын пысықтау болды. Аймақтың табиғи жағдайлары ескеріліп, өрттің әртүрлі сценарийлері модельденді. Жаттығу барысында қатысушылар халықты жедел хабардар ету, эвакуациялау, өрттің шартты ошағын оқшаулау және сөндіру әдістерін практикалық тұрғыда орындады.

Әкімдіктер, орман шаруашылығы және құтқару қызметтері арасындағы үйлестіруге, сондай-ақ өрт сөндіру техникасы мен байланыс құралдарының техникалық жағдайын тексеруге ерекше назар аударылды. Сонымен қатар, жергілікті халық арасында орман өрттерінің алдын алу шаралары бойынша ақпараттық-түсіндіру жұмыстары жүргізілді.

Оқу-жаттығу қорытындысы бойынша жедел әрекет ету, алдын алу шараларын күшейту және жергілікті деңгейде өзара іс-қимылды жетілдіру бойынша ұсыныстар берілді. Мұндай іс-шаралар төтенше жағдайлар туындаған кезде жедел әрекет етуге және орман қорын өрттен қорғауға ықпал етеді.