Алматы қаласының ТЖД Алматы облысының ТЖД өрт сөндіру автотехникасын табыстады

Министрдің ауылдық жерлердегі өрттерге әрекет ету әлеуетін күшейту жөніндегі тапсырмасын іске асыру аясында Алматы қаласының ТЖД Алматы облысына өрт сөндіру автотехникасын табыстады. Бұл техника әрі қарай жаңа ауылдық өрт сөндіру бекеттері – «Ауыл құтқарушылары» жобасы аясында аудан әкімдіктеріне бөлінеді.

5 бірлік өрт сөндіру автоцистернасы техникалық қызмет көрсетуден өтіп, толықтай пайдалануға дайын күйінде берілді. Бұл техникалар Алматы облысының шалғай орналасқан, өртке қарсы қорғауы төмен елді мекендерінде қолданылады, онда жедел әрекет ету мүмкіндігі бұған дейін шектеулі болған.

«Техниканы тапсыру – жай ғана логистикалық шара емес, бұл Алматы қаласы ТЖД-ның ауыл тұрғындарының қауіпсіздігін арттыруға қосқан үлесі. Берілген техника аймақ тұрғындарының өмірі мен мүлкін қорғауға қызмет етеді деп сенемін», – деп атап өтті ҚПС төрағасы.

Мұндай бекеттердің құрылуы өрт орнына жету уақытын айтарлықтай қысқартып, жергілікті органдардың дайындық деңгейін арттырады және шағын елді мекендерде қауіпсіздік мәдениетін қалыптастырады.

«Біз бірлесіп тиімді әрекет ету жүйесін құрып жатырмыз. Алматы қаласындағы әріптестерімізге техникалық қолдау көрсеткендері үшін алғысымызды білдіреміз. Бұл техникалар жақын арада ауылдық округтерде жауынгерлік кезекшілікке қойылады», – деп пікір білдірді Алматы облысы ТЖД бастығы.

«Ауыл құтқарушылары» бекеттерінің желісін кеңейту жұмыстары 2025 жылы да белсенді түрде жалғасуда.

Алматы облысының ТЖД