Педагогтар мен балаларға қауіпсіздік туралы айтылды

Зеренді ауданында орналасқан «Парус» балаларды сауықтыру орталығында «Климат күтпейді» атты оқушылар мен педагогтарға арналған Жазғы климаттық лагерь өтіп жатыр.

Қазақстанның түкпір-түкпірінен келген 60-қа жуық оқушы қатысып жатқан бұл ауқымды іс-шара аясында Ақмола облысы ТЖД қызметкерлері жаз мезгіліндегі қауіпсіздік ережелері бойынша түсіндіру жұмыстарын жүргізді. Азаматтық қорғаныс басқармасының офицерлері су айдындарындағы қауіпсіздік ережелерін егжей-тегжейлі түсіндірді. Балаларды алып жүрген педагогтар үшін арнайы дәріс ұйымдастырылды.

Теориялық бөлімнен бөлек, құтқарушылар алғашқы медициналық көмек көрсету тәсілдерін көрсетіп, балаларды жедел-құтқару жасағының жабдықтарымен және жұмысымен таныстырды. Лекциялар тәжірибелік жаттығулармен қатар жүріп, оқушылардың қызығушылығын оятты.

Іс-шара соңында құтқарушылар шартты зардап шеккен адамды судан құтқару тәсілін көрсетті.

Мұндай жұмыстар бұған дейін де бірнеше рет өткізілгенін атап өткен жөн. Балаларға арналған сауықтыру лагерьлері — құтқарушылар үшін басты мақсатты аудиториялардың бірі.

Ақмола облысы ТЖД баспасөз қызметі