Орталық сайлау комиссиясы ҚР Конституциясының 30 жылдығымен құттықтады

Орталық сайлау комиссиясы ҚР Конституциясының 30 жылдығымен құттықтады

Орталық сайлау комиссиясында ҚР Конституциясының қабылданғанына 30 жыл толуына арналған салтанатты іс-шара ұйымдастырылды.

Салтанатты шараны ашқан ОСК Төрағасы Нұрлан Әбдіров
1995 жылы 30 тамызда бүкілхалықтық референдумда қабылданған Конституцияның  тарихи маңызына тоқталды:

«Бүгін біз Тәуелсіздігіміздің берік іргетасы және халық бірлігінің символына айналған Конституцияның 30 жылдығын атап өтудеміз. Конституцияда ең жоғары құндылықтар – адам құқықтары мен бостандықтары, әділдік пен заң үстемдігі бекітілді.

Отыз жыл ішінде ол дамудың және реформалардың жолынан өтіп, Қазақстанның демократия мен құқықтық мемлекетке қарай ілгерілеуін айқын көрсетті.

Осы кезең ішінде елімізде 40-тан астам республикалық электоралдық науқандар өткізілді. Оның ішінде, 6 рет Президент сайлауы, 8 мәрте Мәжіліс депутаттарының сайлауы ұйымдастырылды. Сонымен қатар, 4 республикалық референдум өткізіліп, халықтың саяси еркін білдіруіне мүмкіндік жасалды. Барлық ауыл әкімдерінің сайлауы өткізілді.

Бұл қадамдар еліміздегі демократиялық дәстүрдің орнығуы, сайлау институттарының нығаюына айқын дәлел бола алады».

Мереке қарсаңында еліміздің сайлау жүйесін дамытуға қосқан үлесі үшін ОСК мүшелері мен аппаратының бірқатар қызметкерлері «Қазақстан Республикасының Конституциясына 30 жыл» мерейтойлық медалімен марапатталды.

Салтанатты жиын мемлекеттік қызметке алғаш қабылданған қызметшілердің ант қабылдау рәсіміне ұласты. Ортсайлаукомға қызметке қабылданған жас мемлекеттік қызметшілер халыққа адал қызмет етуге салтанатты түрде ант берді.