Халықаралық математика олимпиадасының жүлдегері MIT-ге оқуға түсті

Haileybury Almaty мектебінің 12-сынып оқушысы Әмірлан Аманжолов -ұлттық құраманың мүшесі және Қазақстанның болашағынан зор үміт күттіретін жас математиктерінің бірі.

Соңғы жылдары ол әлемдік ареналарда тұрақты түрде жоғары нәтижелер көрсетіп келеді. Әмірлан олимпиадалық математикамен 7-сыныптан бастап айналысады. Оның халықаралық жарыстардағы жетістіктері -жүйелі дайындықтың, ұстаздары мен отбасының қолдауымен атқарылған көпжылдық еңбектің жемісі.

2025 жылы Әмірлан Австралияда өткен 66-шы Халықаралық математика олимпиадасына (IMO) қатысты. Жарыс қорытындысы бойынша Қазақстан құрамасы 112 елдің ішінде 17-орынға ие болса, Әмірланның өзі күміс медаль жеңіп алды.

Оқушының жетістіктері мемлекеттік деңгейде жоғары бағаланды. 2025 жылы ол Мемлекет басшысы Қасым-Жомарт Тоқаевтың қабылдауында болып, 1000 АЕК көлеміндегі біржолғы сыйақы сертификатын иеленді. Сонымен қатар, оқушының жаттықтырушысы да мемлекеттік наградамен марапатталды.

Толағай табыстарының арқасында Әмірлан Гарвард, Стэнфорд, Калифорния және Массачусетс технологиялық институттары (MIT), сондай-ақ Лондонның Империялық колледжі сияқты әлемнің жетекші жоғары оқу орындарынан шақырту алды. Нәтижесінде ол өзіне толық білім беру гранты ұсынылған Массачусетс технологиялық институтын (MIT) таңдады.

Әмірланның айтуынша, олимпиадалық қозғалыс оның академиялық дамуының негізгі факторы болып, армандаған университетіне түсуге септігін тигізген.