Петропавл әкімі қаланың он айдағы даму қорытындыларын жариялады

Өңірлік коммуникациялар қызметінің алаңында Петропавл қаласының әкімі Серік Мұхамедиевтің баспасөз конференциясы өтіп, онда 2025 жылдың қаңтар–қазан айларындағы қаланың әлеуметтік-экономикалық дамуының қорытындылары жарияланды.       

Әкімнің айтуынша, негізгі бағыттардың басым бөлігінде тұрақты өсім байқалады: өнеркәсіп өндірісінің көлемі 482,7 млрд теңгеге жетіп, өткен жылмен салыстырғанда 29,1% артты, негізгі капиталға салынған инвестициялар 158,7 млрд теңгені құрады, оның 78,1%-ын жеке сектор қамтамасыз етті. Жыл басынан бері 106 мың шаршы метрден астам тұрғын үй пайдалануға берілді, жыл соңына дейін тағы 100 мың шаршы метрден астамын тапсыру жоспарланған. Бөлшек сауда көлемі 246 млрд теңгеге өсіп, құрылыс жұмыстары көлемі артты, ал қалалық бюджеттің жалпы көлемі 94,3 млрд теңгеге жетті.                                       

Қауіпсіздік мәселесіне ерекше назар аударылды: 2025 жылғы су тасқыны кезеңі бөгеттерді нығайту, айналма арнаны реконструкциялау және сорғы станциясын жаңғырту нәтижесінде су басусыз өтті. Келесі су тасқынына дайындық толық аяқталған. Қалалық ортаны абаттандыру белсенді жүргізілуде — Подгора және Кожевенный ықшамаудандарындағы апатты үйлердің орнына 72 гектар аумақта скверлер, спорт және балалар алаңдары салынып, екі мыңнан астам ағаш отырғызылды. «Қазақстан Халқына» қорының қолдауымен екі футбол ангарының құрылысы басталды.                                         

Заречный кентіндегі су басу мәселесіне қатысты, жыл соңына дейін тұрғындарды Жас Өркен және Орталық ықшамаудандарында салынып жатқан 162 пәтерлік жаңа үйлерге көшіру басталады. «Qyzyljar» АЭА аумағында инвестициялық белсенділік артып, жалпы көлемі 300 млрд теңгеден асатын инвестициялары бар 22 қатысушы тіркелді, бірнеше ірі жоба жүзеге асырылып, мыңнан астам жұмыс орны ашылды. Аумағында салынған 12 мың шаршы метрлік жаңа өндірістік корпус кәсіпорындардың қуатын айтарлықтай арттыруға мүмкіндік береді.

Әлеуметтік нысандардың құрылысы жалғасуда: Жас Өркенде 280 орындық балабақша құрылысы аяқталуға жақын, №29 мектеп пен спорт бассейні бар мұз аренасы пайдалануға берілді. Инженерлік желілер мен жылу магистралдарын жаңғырту, 110/Копай қосалқы станциясын жаңарту және Smart City цифрлық шешімдерін енгізу бойынша жұмыстар жүргізілуде. «Таза Қазақстан» акциясы аясында тоғыз жүзге жуық іс-шара өткізіліп, рұқсатсыз қоқыс орындары жойылды, тазалықты бақылау үшін бейнекамералар орнатылды.                                                                                                                                            

Қалада аулалар мен жолдар қарқынды жаңартылуда: 37 аула абаттандырылып, жабын төселді, шағын архитектуралық формалар орнатылды. Конституция көшесінің кеңістігі толық жаңартылып, брусчатка, демалыс аймағы, құрғақ субұрқақ және амфитеатр салынды. 6000 ағаш және 370 мыңнан астам гүл отырғызылды.                                             

Әкімнің айтуынша, жүзеге асырылып жатқан жобалардың барлығы қалалықтардың өмір сүру сапасын арттыруға, қолайлы, қауіпсіз және заманауи қалалық орта қалыптастыруға бағытталған, ал қол жеткізілген көрсеткіштер Петропавлдың тұрақты дамуын дәлелдейді.