Ақмола облысына жұмыс сапары аясында Оқу-ағарту министрі Жұлдыз Сүлейменова Қосшы қаласындағы қоғамдық орталыққа барып, балалардың жазғы демалысы мен бос уақытын мазмұнды ұйымдастыруға, сондай-ақ қосымша білім беру мен балалардың жан-жақты дамуына арналған мүмкіндіктермен танысты.
Министрге білім беру, мәдени және спорт бағыттарын біріктіретін орталықтың қызметі таныстырылды. Мұнда робототехника, шахмат, шығармашылық және спорт үйірмелері жұмыс істейді, сондай-ақ түрлі мәдени және қоғамдық іс-шараларды өткізуге жағдай жасалған.
Сапар барысында балалардың жазғы демалысын тиімді ұйымдастыру, оларды қосымша біліммен қамту және қабілеттерін дамытуға бағытталған жұмыстарға ерекше назар аударылды.
Сондай-ақ қосымша білім беру инфрақұрылымын дамыту, балалар мен отбасылар үшін қолжетімді әрі жайлы орта қалыптастыру мәселелері талқыланды.
Осындай қоғамдық орталықтар балалардың сапалы демалысын ұйымдастыруға, шығармашылық және спорттық әлеуетін дамытуға, сондай-ақ тұрғындардың бос уақытын тиімді өткізуіне мүмкіндік береді.
– Былтыр Бейжіңде өткен Жасанды интеллект бойынша олимпиададан Қазақстан оқушылары үш алтын, бір күміс және үш қола медаль жеңіп алды. Ел мерейін асыратын бұл жетістік жастарымыздың зияткерлік және шығармашылық әлеуетінің зор екенін көрсетеді. Орайлы сәтті пайдалана отырып, талантты өрендерімізге бағыт-бағдар беріп жүрген ұстаздар мен тәлімгерлерге алғыс айтамын, – деді Мемлекет басшысы.
Президент бұл олимпиада жасанды интеллектіні зерттеуші жастардың халықаралық қауымдастығының дамуына үлкен серпін беретініне сенім білдірді.
– Білім қай заманда да халықты біріктіріп, адамзатты өркениеттің шыңына жетеледі. Сіздердің қарым-қабілеттеріңіз медицина, білім, экология және басқа да өте маңызды салалардағы тың шешімдерге негіз бола алады. Дәл осы олимпиадада әлемді өзгертетін жаңа идеялар мен жобалар дүниеге келуі мүмкін, – деді Мемлекет басшысы.
Қасым-Жомарт Тоқаев олимпиада қатысушыларына сәттілік тілеп, осы маңызды шараны ұйымдастыруға үлес қосқан барша азаматқа шынайы ризашылығын білдірді.
– Қазақстан Біріккен Ұлттар Ұйымының электронды үкіметті дамыту индексінде 193 мемлекеттің арасынан 24-орын алады. Жаңа технологияларды енгізуге әзірлік деңгейі бойынша еліміз Орталық Азияда көш бастап тұр. Біз бірыңғай инновациялық экожүйе құрып жатырмыз. Мұнда жасанды интеллект мемлекетті, экономиканы, бизнесті басқарудың маңызды тетігі ретінде қоғам өмірінің барлық саласына дендеп енеді. Былтырғы Жолдауымда алдағы үш жыл ішінде Қазақстанды толық цифрлық мемлекетке айналдыру бойынша нақты міндет жүктедім. 2026 жылды Цифрландыру және жасанды интеллект жылы деп жариялау да – осы стратегиялық бағдарды жүзеге асыруға бағытталған қадам. Бұдан бөлек, инновацияға иек артатын ел дамуының негізгі бағыттары 1 шілдеде күшіне енген Қазақстанның жаңа Конституциясында анық көрсетілген. Бұл – барлық үдерістің басы ғана, – деді Мемлекет басшысы.
Оқу-ағарту министрлігі «Адал азамат» біртұтас тәрбие бағдарламасын іске асыруды жалғастырады. Бағдарлама Мемлекет басшысы Қасым-Жомарт Тоқаевтың «Әділетті Қазақстан - Адал азамат - Озық ойлы ұлт» идеясын тәрбие жұмысының өзегіне айналдыруға бағытталған.
Бүгінде мектептегі тәрбие жұмысы жекелеген іс-шаралармен шектелмейді. Оқушының тұлғалық дамуына ықпал ететін тұтас тәрбиелік экожүйе қалыптасуда. Бағдарламаның алғаш рет ведомствоаралық деңгейде іске асырылуы тәрбие мәселесін мектептің ғана емес, мемлекет пен қоғамның ортақ жауапкершілігі ретінде қарастыруға мүмкіндік береді.
2026-2027 оқу жылында оқушылардың құқықтық мәдениетін қалыптастыру мақсатында 5-7-сыныптарға «Конституция негіздері», 8-11-сыныптарға «Заң және тәртіп» оқу курстары енгізіледі. Ал «Жеке қауіпсіздік» курсы балалардың қауіпсіз мінез-құлық дағдыларын дамытуға және түрлі жағдайда дұрыс шешім қабылдауына бағытталады.
Жаңа Конституция негізінде «Адал азамат» бағдарламасының брендбугі де жаңартылды. Мектеп кеңістігі тәрбие берудің маңызды құралы ретінде қарастырылады. Баланың қалыптасуына мұғалім мен ата-анамен бірге оны қоршаған білім беру ортасы да ықпал етеді.
Сонымен қатар Мемлекет басшысы Қасым-Жомарт Тоқаевтың тапсырмасына сәйкес «Таза Қазақстан» тұжырымдамасы аясында «Жасыл мектеп» пилоттық жобасы басталады. Жоба экологиялық білімді оқу үдерісіне кіріктіріп, оқушылардың табиғатқа жауапкершілікпен қарау мәдениетін қалыптастыруды көздейді.
Осы бастамалар арқылы «Адал азамат» құндылықтары мектеп өмірінің ажырамас бөлігіне айналып, әрбір баланың жан-жақты дамуына қолайлы орта қалыптасады.
2026 жылғы 26 шілде мен 2 тамыз аралығында Румынияның Бухарест қаласында Лингвистикадан халықаралық олимпиада (IOL) өтті.
Қазақстан құрамасының төрт мүшесі де жоғары нәтиже көрсетіп, бір қола медаль мен үш Құрмет грамотасын иеленді.
Қола медаль иегері:
• Шыңғыс Карасаев - Орал қаласындағы жаратылыстану-математика бағытындағы NIS-тің 12-сынып оқушысы.
Құрмет грамотасының иегерлері:
• Рамазан Бутантаев - Маңғыстау облысы Ақтау қаласы бойынша білім бөліміне қарасты Мамандандырылған IT лицейінің 11-сынып оқушысы;
• Аслан Ажибаев - Павлодар қаласындағы жаратылыстану-математика бағытындағы NIS-тің 12-сынып оқушысы;
• Кирилл Тургумбаев - Қостанай облысы Жітіқара ауданы білім бөліміне қарасты Абай атындағы мектеп-лицейінің 11-сынып оқушысы.
Осылайша, Қазақстан құрамасының аталған олимпиадаға қатысу тарихында алғаш рет команда мүшелерінің барлығы марапатқа ие болды.
Құрамаға Ягеллон университетінің студенті Оспанова Дана Еркінқызы жетекшілік етті.
Олимпиадалық лингвистика елімізде дамып келе жатқан жаңа бағыттардың бірі. Бұл нәтиже қазақстандық оқушылардың аталған саладағы жоғары әлеуетін көрсетті.
Құрама мүшелерін және жетекшісін, сондай-ақ оқушылардың ұстаздары мен ата-аналарын шын жүректен құттықтаймыз! Жас зияткерлерімізге алдағы жарыстарда толағай табыс тілейміз!
2026 жылғы 24-30 шілде аралығында Литва Республикасының Каунас қаласында Информатикадан Еуропалық жасөспірімдер олимпиадасы (European Junior Olympiad in Informatics, EJOI 2026) өтті. Білім додасына 25 елден 100-ден астам оқушы қатысты.
EJOI - 16 жасқа дейінгі мектеп оқушыларына арналған информатика саласындағы ең беделді халықаралық олимпиадалардың бірі. Ол дарынды оқушылардың бағдарламалау, алгоритмдеу және компьютерлік ғылымдар бағытындағы қабілеттерін дамытуға арналған.
Олимпиада екі жарыс күнінен тұрды. Қатысушылар әртүрлі күрделілік деңгейіндегі алгоритмдік есептерді шешіп, білімдері мен практикалық дағдыларын сынға салды.
Қазақстан намысын жалпы білім беретін пәндер бойынша республикалық олимпиаданың информатика пәнінен жеңімпаздары мен жүлдегерлерінен жасақталған ұлттық құрама қорғады.
Жарыс қорытындысы бойынша Қазақстан құрамасы 1 алтын, 1 күміс, 1 қола медаль және 1 мақтау грамотасын иеленді.
Еламан Алишер, Алматы қаласындағы Республикалық физика-математика мектебінің 8-сынып оқушысы - алтын медаль;
Бельгимбаев Амир, Алматы қаласындағы Республикалық физика-математика мектебінің 9-сынып оқушысы - күміс медаль;
Ермұханов Ислам, Ақтөбе облыстық мамандандырылған «Білім-Инновация» лицей-интернатының 9-сынып оқушысы - қола медаль;
Жангелді Санжар, Қарағанды облыстық Н. Нұрмақов атындағы мамандандырылған мектеп-лицей-интернатының 9-сынып оқушысы - мақтау грамотасы.
Ұлттық құраманы Қазақстан құрамасының жетекшісі, Astana IT University Бағдарламалық инженерия мектебінің ACM жаттықтырушысы, республикалық және халықаралық олимпиадалардың жеңімпазы Темірлан Сатылханов және «EdLight Academy» білім беру орталығының информатика пәні бойынша жаттықтырушы-оқытушысы Арман Исаев дайындады.
Айта кетейік, 2025 жылы Қазақстан құрамасы EJOI олимпиадасында 1 күміс және 3 қола медаль иеленген болатын. Биыл ұлттық құраманың қоржыны алтын медальмен толықты.
Жүлдегерлер мен олардың жаттықтырушыларын құттықтаймыз!
2026 жылғы 1 тамыздан 30 қыркүйекке дейін Жалпыға міндетті білім беру қоры аясында әлеуметтік осал санаттағы балаларға мектеп формасын, аяқ киім мен мектеп құралдарын сатып алуға көмек көрсетіледі.
2026-2027 оқу жылы қарсаңында 450 мыңға жуық бала қолдаумен қамтылады. Осы мақсаттарға жергілікті бюджеттерде 23 млрд теңгеге жуық қаражат қарастырылған.
Көмектің ең төменгі мөлшері бір балаға 50 851 теңгені құрайды. Бұл өткен жылмен салыстырғанда 10 пайызға артық. Жергілікті бюджеттің мүмкіндіктеріне қарай жекелеген өңірлерде төлем мөлшері жоғары болуы мүмкін.
Көмек жетім балалар мен ата-анасының қамқорлығынсыз қалған балаларға, аз қамтылған отбасылардан шыққан оқушыларға, атаулы әлеуметтік көмек алатын отбасылардың балаларына, сондай-ақ өмірлік қиын жағдайға тап болған балаларға беріледі.
Төлемді алу үшін ата-аналар немесе заңды өкілдер тиісті құжаттарды білім беру ұйымына тапсыруы қажет.
Қазақстан Республикасы Оқу-ағарту министрлігі 2026–2027 оқу жылының басталу және аяқталу мерзімдерін, сондай-ақ орта білім беру ұйымдарындағы оқушылардың демалыс кезеңдерін бекітті.
Жаңа оқу жылы 2026 жылғы 1 қыркүйекте басталып, 2027 жылғы 25 мамырда аяқталады.
Бірінші тоқсан 8 оқу аптасына созылады. Күзгі демалыс 7 күнге жалғасып, 2026 жылғы 26 қазан мен 1 қараша аралығында өтеді.
Екінші тоқсан да 8 оқу аптасын құрайды. Қысқы демалыс 14 күнге созылып, 2026 жылғы 28 желтоқсан мен 2027 жылғы 10 қаңтар аралығында өтеді.
Бірінші сынып оқушылары үшін 2027 жылғы 8–14 ақпан аралығында 7 күндік қосымша демалыс қарастырылған.
Үшінші тоқсан 10 оқу аптасына созылады. Көктемгі демалыс 7 күнге жалғасып, 2027 жылғы 22–28 наурыз аралығында өтеді.
Төртінші тоқсан 8 оқу аптасына созылып, 2027 жылғы 25 мамырда аяқталады.
Сондай-ақ 9 (10) және 11 (12) сынып түлектерінің қорытынды аттестаттау мерзімдері бекітілді.
Жұмыс сапары аясында Оқу-ағарту министрі Жұлдыз Сүлейменова Ақмола облысы Целиноград ауданындағы Талапкер ауылында орналасқан IT мектеп-лицейіне барды.
Жұлдыз Сүлейменова мектеп жанынан ұйымдастырылған жазғы мектептің жұмысымен танысып, оқушылардың жазғы демалысын мазмұнды ұйымдастыруға бағытталған іс-шаралардың өту барысын көрді.
Сондай-ақ министр білім беру ұйымының материалдық-техникалық базасын аралап, оқу кабинеттерін, кітапхананы, спорт залдарын, асхананы және қауіпсіздік жүйесін қарап шықты. Жаңа оқу жылына дайындық жұмыстары мен білім беру процесін ұйымдастыру мәселелеріне назар аударды.
Бүгінде мектепте 1400-ге жуық оқушы білім алады. Сондай-ақ мектеп жанындағы екі мектепалды даярлық тобында 64 тәрбиеленуші бар. Білім беру ұйымында 111 педагог және 32 қызметкер, барлығы 143 адам еңбек етеді. Мектеп арнайы жабдықталған физика және биология кабинеттерімен, екі информатика кабинетімен, кітапханамен, екі спорт залымен, мәжіліс залымен, асханамен және заманауи қауіпсіздік жүйесімен қамтамасыз етілген.
Сапар барысында балалардың қауіпсіздігі, білім беру сапасын арттыру және жаңа оқу жылына сапалы дайындық мәселелеріне ерекше назар аударылды.
Қазақстанның ұлттық құрамасы 1959 жылдан бері өткізіліп келе жатқан мектеп оқушылары арасындағы ең көне әрі ең беделді халықаралық пәндік жарыс - 67-ші Халықаралық математика олимпиадасында (IMO) жоғары нәтиже көрсетті. 117 елдің оқушылары қатысқан олимпиаданың бейресми командалық медальдық есебінің қорытындысы бойынша Қазақстан әлемнің үздік 25 құрамасының қатарына еніп, 22-орынға тұрақтады. Ұлттық құраманың барлық алты мүшесі жүлдегер атанып, үш күміс және үш қола медаль иеленді.
Халықаралық математика олимпиадасындағы бұл жетістік Қазақстанның ұлттық құрамалары үшін нәтижелі өткен шілде айының жарқын қорытындысы болды. Бір айдың ішінде қазақстандық оқушылар физика, химия, биология, математика және экономика пәндері бойынша өткен халықаралық олимпиадаларда 24 медаль жеңіп алды. Ең бастысы - аталған бес халықаралық олимпиаданың барлығында Қазақстанның әрбір қатысушысы жүлдегер атанды.
Бұл жетістіктер Мемлекет басшысы Қасым-Жомарт Тоқаевтың дарынды балаларды қолдау, олардың қабілетін дамыту және халықаралық деңгейде бәсекеге қабілетті ұрпақ қалыптастыру жөніндегі жүйелі саясатының нақты нәтижесі болып табылады. Сонымен қатар, бұл дарынды оқушыларды анықтау, қолдау және халықаралық деңгейдегі зияткерлік жарыстарға жүйелі даярлау жұмысының тиімділігін тағы бір мәрте дәлелдейді.
Колумбияда өткен 56-шы Халықаралық физика олимпиадасында (IPhO) 85 елден 381 оқушы бақ сынады. Қазақстан құрамасы тарихи жетістікке қол жеткізіп, алғаш рет ұлттық құраманың барлық бес мүшесі алтын медаль жеңіп алды. Егер 2025 жылы команда екі күміс және үш қола медаль еншілесе, биыл бес алтын медальға қол жеткізді. Бейресми командалық медальдық есептің қорытындысы бойынша Қазақстан әлемнің үздік құрамаларымен бірге 1-орынды бөлісті.
Ташкент қаласында өткен 58-ші Халықаралық химия олимпиадасында (IChO) 90-нан астам елден 350-ден астам оқушы қатысты. Қазақстанның төрт қатысушысының барлығы жүлдегер атанып, бір алтын және үш күміс медаль жеңіп алды. Нәтижесінде ұлттық құрама бейресми командалық медальдық есепте үздік ондыққа еніп, 10-орынды иеленді.
Вильнюс қаласында өткен 37-ші Халықаралық биология олимпиадасында (IBO) 84 елден 330-дан астам оқушы бақ сынады. Қазақстан құрамасының барлық мүшесі жүлдегер атанып, үш күміс және бір қола медаль иеленді. Осылайша, ұлттық құрама 1996 жылы қол жеткізілген осы олимпиададағы Қазақстанның ең үздік нәтижесін қайталады. Өткен жылы төрт қола медаль жеңіп алған командамен салыстырғанда, биылғы көрсеткіш айтарлықтай жақсарды. Бейресми командалық медальдық есепте Қазақстан 18-орынға тұрақтады.
Қытайда өткен Халықаралық экономика олимпиадасында (IEO) 61 елден шамамен 300 оқушы қатысты. Қазақстан құрамасы бұл додада да жүз пайыздық нәтижеге қол жеткізіп, бір алтын, үш күміс және бір қола медаль жеңіп алды. Қазақстандық Мұхтархан Батырхан IEO олимпиадасының алтын медалін екінші рет иеленді. Бейресми командалық медальдық есепте Қазақстан үздік ондыққа еніп, 10-орыннан көрінді.
Шілде айындағы халықаралық олимпиадалардың қорытындылары Қазақстанның әлемдегі жетекші зияткерлік құрамалардың қатарындағы орнының нығайып келе жатқанын көрсетті. Физикадан бейресми командалық есепте 1-орын, химия мен экономикадан үздік ондыққа ену, биологиядан 18-орын және математикадан әлемнің үздік 25 құрамасының қатарына қосылу еліміздегі дарынды оқушыларды халықаралық деңгейде даярлау жүйесінің тиімділігінің кезекті дәлелі болды.
Халықаралық олимпиадалар маусымы жалғасуда. Тамыз айында Қазақстанның ұлттық құрамалары Халықаралық информатика олимпиадасына (IOI), Халықаралық география олимпиадасына (IGeO) және Халықаралық лингвистика олимпиадасына (IOL) қатысады. Аталған олимпиадалардың қорытындысы бойынша Қазақстан 2026 жылғы ең ірі жеті халықаралық пәндік олимпиаданың барлығына қатысу циклін аяқтайды.