Қазақстан Республикасы Оқу-ағарту министрлігі мектепке дейінгі, орта, техникалық және кәсіптік, орта білімнен кейінгі, инклюзивті және қосымша білім беру, сондай-ақ бала құқықтарын қорғау және арнаулы әлеуметтік қызметтер көрсету салаларында халықаралық ынтымақтастықты дамытады.
Негізгі бағыттар:
халықаралық шарттар мен келісімдерді іске асыру;
халықаралық ұйымдармен және әріптес елдермен өзара іс-қимыл жасау;
халықаралық жобаларға, бастамаларға және форумдарға қатысу;
білім беру ұйымдарының халықаралық ынтымақтастығын үйлестіру;
стратегиялық әріптестікті дамыту және тәжірибе алмасу.
Халықаралық ынтымақтастықтың мақсаты – озық тәжірибелерді енгізу, білім беру сапасын арттыру, адами капиталды дамыту және тұрақты даму мақсаттарына қол жеткізу.
Тәрбие жұмысы және қосымша білім беру – Оқу-ағарту министрлігінің басты басымдықтарының бірі. Аталған бағыт аясында өскелең ұрпақтың ұлттық және жалпыадамзаттық құндылықтарға негізделген дүниетанымын, азаматтық белсенділігін, отансүйгіштік сезімін, жауапкершілігін қалыптастыруға баса мән беріледі.
Министрлік тарапынан келесі негізгі міндеттер жүзеге асырылады:
білім беру ұйымдарында тәрбие жұмысының сапасын арттыру және бірыңғай тәрбие тұжырымдамасын енгізу;
балалар мен жасөспірімдер арасында азаматтық, рухани-адамгершілік, патриоттық тәрбие беру жүйесін жетілдіру;
қосымша білім беру ұйымдарының желісін кеңейту және балалардың шығармашылық, зияткерлік, техникалық қабілеттерін дамытуға жағдай жасау;
оқушылардың өзін-өзі басқару, дебаттық қозғалыс, волонтерлік, жасөспірімдер ұйымдары арқылы белсенділік танытуына қолдау көрсету;
кәмелетке толмағандар арасындағы құқық бұзушылықтың, буллинг пен девиантты мінез-құлықтың алдын алу шараларын үйлестіру;
балалардың жазғы демалысы мен сауықтырылуын ұйымдастыру, инклюзивті демалыс мүмкіндіктерін кеңейту;
халықаралық ынтымақтастық пен тәрбие жұмысының үздік тәжірибелерін енгізу.
Бұл жұмыстар білім алушылардың жан-жақты дамуына, елжанды әрі жауапты азамат болып қалыптасуына бағытталған.
Қазақстан Республикасы Оқу-ағарту министрлігі балалардың құқықтары мен заңды мүдделерін қорғау саласындағы мемлекеттік саясатты жүзеге асырады. Министрліктің негізгі мақсаты – әрбір баланың амандығын қамтамасыз ету, қауіпсіз, инклюзивті және қолдаушы білім беру ортасын құру, сондай-ақ кемсітудің, зорлық-зомбылық пен немқұрайлылықтың кез келген түрінің алдын алу.
Министрлік қызметінің негізгі бағыттарына мыналар жатады:
балалардың білім алуға, қауіпсіздікке, зорлық-зомбылық пен қатыгез қарым-қатынастан қорғауға деген құқықтарының сақталуын қамтамасыз ету;
кәмелетке толмағандар арасындағы құқық бұзушылықтардың, буллинг пен девиантты мінез-құлықтың алдын алу;
мектептік өзін-өзі басқару институттарын, мектеп омбудсменін және балалар қоғамдық бірлестіктерін дамыту;
оқушылар, ата-аналар мен педагогтер арасында бала құқықтары мәдениетін қалыптастыру және құқықтық сауаттылықты арттыру;
балалардың құқықтарын қорғау саласында мемлекеттік органдармен, халықаралық және қоғамдық ұйымдармен өзара іс-қимыл жасау.
Техникалық және кәсіптік, орта білімнен кейінгі білім беру – Қазақстан Республикасының білім беру жүйесінің ажырамас бөлігі болып табылады. Аталған салада мемлекеттік саясатты қалыптастыру мен іске асыруға Қазақстан Республикасы Оқу-ағарту министрлігі жауапты орган ретінде қатысады.
Министрлік азаматтардың сапалы білім алуына қолайлы жағдай жасауға, олардың кәсіби қалыптасуы мен дамуына ықпал етуге бағытталған келесі міндеттерді іске асырады:
техникалық және кәсіптік, орта білімнен кейінгі білім беру саласында бірыңғай мемлекеттік саясатты қалыптастыру және іске асыру;
ұлттық және жалпыадамзаттық құндылықтарға негізделген тұлғаның жан-жақты дамуына бағытталған сапалы білім беру үшін қажетті жағдайлар жасау;
техникалық және кәсіптік білім беру ұйымдарында білім беру мазмұны мен оқу үдерісін ұйымдастыруда заманауи технологияларды енгізу;
экономиканың салалары мен қоғам қажеттіліктеріне сәйкес сұранысқа ие техникалық және қызмет көрсету мамандықтары бойынша білікті кадрларды даярлауға құқықтық негіз қамтамасыз ету;
мемлекеттік қызметтердің сапасын арттыру, олардың нормативтік-құқықтық базасын жетілдіру және тиімділігін бағалау мақсатында тұрақты мониторинг жүргізу;
Жастар корпусын дамыту жобасын іске асыру және оны үйлестіру жұмыстарын жүргізу;
студенттер арасында рухани-адамгершілік, патриоттық, экологиялық тәрбиені насихаттау, белсенді азаматтық ұстаным, парасаттылық пен салауатты өмір салтын қалыптастыру бағытында іс-шаралар ұйымдастыру.
Қазақстан Республикасында орта білім беру міндетті болып табылады және үш деңгейден тұрады: бастауыш, негізгі орта және жалпы орта білім беру. Орта білім беру саласында бірыңғай мемлекеттік саясатты қалыптастыру және іске асыру Оқу-ағарту министрлігінің құзыретіне кіреді. Министрлік сапалы білімге қолжетімділікті қамтамасыз ете отырып, білім беру процесін ұлттық және жалпыадамзаттық құндылықтар, ғылым мен озық тәжірибе негізінде ұйымдастырады.
Министрліктің орта білім беру саласындағы негізгі функциялары:
мемлекеттік жалпыға міндетті стандарттарды, үлгілік оқу жоспарлары мен бағдарламаларды әзірлеу;
оқу-әдістемелік жұмысты ұйымдастыру және үйлестіру;
оқулықтармен және оқу-әдістемелік кешендермен қамтамасыз ету;
білім алушылардың білімін бағалау жүйесін дамыту және аттестацияларды өткізу;
халықаралық және республикалық білім беру бағдарламалары мен олимпиадаларды жүзеге асыру;
педагогтердің біліктілігін арттыру және педагогикалық қызметтің стандарттарын әзірлеу;
білім беру саласындағы мемлекеттік қызметтерді көрсету.
Оқу-ағарту министрлігі мектепке дейінгі, орта, қосымша, техникалық және кәсіптік, орта білімнен кейінгі білім беру салаларында мемлекеттік инвестициялық саясатты қалыптастырады және оны әдіснамалық тұрғыда сүйемелдейді.
Негізгі бағыттары:
білім беру объектілерінің инфрақұрылымын дамыту бойынша перспективалық жоспарларды әзірлеу (жаңа нысандар салу, қайта құру, жаңарту, күрделі және ағымдағы жөндеу);
«Келешек мектептері» ұлттық жобалар аясында құрылыс және сейсмикалық нығайту жобаларын үйлестіру, мониторинг және бақылау;
білім беру ұйымдарының материалдық-техникалық базасын жаңарту жобаларын іске асыруды қадағалау;
білім беру саласында мемлекеттік-жекешелік әріптестік (МЖӘ) тетіктерін енгізу және дамыту;
инфрақұрылымдық мәселелер бойынша мемлекеттік және салалық жобалық офистермен өзара іс-қимыл жасау.
Мектепке дейінгі білім беру – Қазақстан Республикасы Оқу-ағарту министрлігінің құрылымындағы маңызды және басым бағыттардың бірі болып табылады. Бұл сала балалардың ерте жастан бастап жан-жақты дамуын, мектепке дейінгі ұйымдарға тең қолжетімділігін және сапалы білім алу құқығын қамтамасыз етуге бағытталған.
Министрлік осы салада бірыңғай мемлекеттік саясатты қалыптастырады және іске асырады, стратегиялық құжаттар мен нормативтік құқықтық актілерді әзірлейді, мемлекеттік жалпыға міндетті білім беру стандарттары мен оқу бағдарламаларын бекітеді.
Мектепке дейінгі білім беру жүйесінде келесі негізгі міндеттер жүзеге асырылады:
білім беру қызметтерінің сапасы мен қолжетімділігін арттыру;
балалардың физиологиялық, психологиялық және әлеуметтік даму ерекшеліктерін ескере отырып, тәрбиелеу мен оқытуды ұйымдастыру;
инклюзивті білім беруді дамыту, ерекше білім беру қажеттіліктері бар балаларға жағдай жасау;
отбасымен және қоғаммен серіктестік қағидаттарын енгізу;
педагогтердің кәсіби құзыреттілігін арттыру және кадрлық әлеуетті дамыту.
Министрлік мектепке дейінгі ұйымдардың қызметіне әдістемелік және әдіснамалық қолдау көрсетеді, кадрларды даярлау және қайта даярлау жүйесін жетілдіреді, халықаралық тәжірибені енгізуге ықпал етеді. Сонымен қатар, мемлекеттік білім беру тапсырысын орналастыру, инфрақұрылымды дамыту, мониторинг жүргізу, қаржыландыру тетіктерін жетілдіру бағытында жұмыстар атқарылады.
Цифрландыру – бұл білім беру жүйесінде ақпараттық-коммуникациялық технологияларды кеңінен енгізу арқылы басқару тиімділігін арттыру, мемлекеттік қызметтерді автоматтандыру және деректерді талдауға негізделген шешімдер қабылдау үдерісі.
Министрлік пен ведомстволық бағынысты ұйымдарда цифрландыру жұмыстары бірыңғай мемлекеттік саясат шеңберінде жүргізіледі. Бұл бағыттағы негізгі мақсаттар – ақпараттық жүйелерді құру, дамыту және жаңғырту, мемлекеттік қызмет көрсету бизнес-процестерін оңтайландыру және автоматтандыру, деректердің өзектілігі мен қауіпсіздігін қамтамасыз ету.
Цифрландыру шеңберінде «Ұлттық білім беру дерекқоры» сияқты ірі ақпараттық жүйелерді енгізу мен сүйемелдеу, білім беру платформаларын (LMS) үйлестіру, педагогтерді аттестаттау және жұмысқа қабылдау үдерістерін автоматтандыру, сондай-ақ оқулықтарды сараптау, оқу процесін онлайн форматта ұйымдастыру секілді маңызды міндеттер атқарылады.
Сонымен қатар, мемлекеттік қызметтер көрсету сапасын арттыруға, цифрлық деректерді басқаруға, нормативтік-құқықтық базаны жетілдіруге, цифрлық трансформацияны жобалық басқару арқылы іске асыруға ерекше мән беріледі. Цифрландыру жұмыстары Мемлекет басшысының Жолдаулары мен стратегиялық құжаттарда белгіленген міндеттерге сәйкес жүзеге асырылады.
Ұлттық білім беру деректер қоры (ҰББДҚ) https://nobd.edu.kz/login
Педагогтерді жұмысқа қабылдау https://hr-nobd.edu.kz/#/sign-in
1 сыныпқа қабылдауға құжаттар қабылдау https://egov.kz/cms/ru/services/secondary_school/pass_mp_203
Педагог портфолиосы https://ustaz-nobd.edu.kz/#/sign-in
«Ұстаз» Педагогтің үздіксіз кәсіби дамуының
ұлттық платформасы https://ustaz.orleu-edu.kz/auth