ҰЭМ басшысы Ақтөбе облысының кәсіпкерлерімен кездесті

Ақтөбе облысына жұмыс сапары аясында Ұлттық экономика министрі Әлібек Қуантыров жергілікті кәсіпкерлермен кездесті.

Кездесуде қатысушылар шағын және орта бизнесті дамыту, оның ішінде моно- және шағын қалалар мен ауылдық елді мекендерде кәсіпкерлікті дамытудың 2021-2025 жылдарға арналған Ұлттық жобасының негізгі бағыттарын талқылады.

Атап айтқанда, заманауи форматтағы сауда объектілерінің құрылысын субсидиялау, тарифтік жүктемені азайту, ШОБ субъектілерінің салық міндеттемелері және мемлекеттік бағдарламаларға қатысу шарттары туралы сөз қозғалды.

Өз кезегінде министр барлық айтылған сұрақтар мен ұсыныстар бойынша министрліктің ұстанымын айтып, әрбір мәселені жеке шешу керектігін айтты.

Сондай-ақ, ол Үкіметтің шағын және орта бизнесті, оның ішінде кәсіпкерлікті дамыту жөніндегі Ұлттық жоба аясында қолдау бойынша белсенді жұмыс жүргізіп жатқанын еске салды.

Мысалы, биыл Ақтөбе облысының ШОБ субъектілеріне мемлекеттік қолдау шараларын іске асыруға 8,6 млрд. теңге бөлінді. Ағымдағы жылғы 1 шілдедегі жағдай бойынша 3 млрд. теңге сомасына 306 жоба субсидияланды, ал кепілдендіру көлемі 4 млрд. теңгеден асты.

Сондай-ақ, министр азаматтардың жеке қабылдауын өткізді. Кездесуге келген ақтөбеліктердің көбісі бизнесмендер болды. Олар өздерін толғандырған мәселелерін көтерді. Соның ішінде МЖӘ (мемлекеттік-жекеменшік әріптестік) саласындағы еңбекақы төлеу қоры бөлігінде мемлекеттік міндеттілікті ұлғайту, АӨК саласында кредиттерді өтеу бойынша қосымша шығыстарды жабу, жабдықтарды әкелуге импорттық баждарды азайту және «Қарапайым заттар экономикасы» аясында несие беру мәселелерін қарастыруды сұрады.

ҰЭМ басшысы азаматтардың барлық өтініштерін бақылауға алды.

Жұмыс сапары барысында Ә.Қуантыров «Даму» Қорының өңірлік филиалының жұмыс барысымен танысты. Министрге Ақтөбе облысындағы мемлекеттік бағдарламалардың іске асырылу қорытындылары туралы баяндалды.

Ағымдағы жылдың 1 шілдесіндегі жағдай бойынша өңірде 443 млрд. теңге сомасына 8 мыңнан астам жобаға қолдау көрсетілді. Аймақтық қаржыландыру бағдарламасы аясында 121 қарыз алушы көмек алды.

Сонымен қатар, Ұлттық экономика министрі Ақтөбе облысы бойынша ТМРКД (Табиғи монополияларды реттеу комитетінің департаменті) жұмысымен танысты. Жиында Департамент қызметінің негізгі бағыттары талқыланды.

Ә.Қуантыров тариф қалыптастыру мәселелерін тұрақты бақылауда ұстауды және халықпен кері байланысты күшейтуді тапсырды.