Агломерацияларды дамыту туралы заң жобасы қоғамдық талқылау үшін «Ашық НҚА» сайтында орналастырылды
Ұлттық экономика министрлігі агломерацияларды дамыту мәселелері бойынша заңнамаға өзгерістер енгізетін заң жобасын әзірледі. Заң жобасы 2022 жылғы 14 қаңтарға дейін қоғамдық талқылау үшін «Ашық құқықтық актілер» веб-сайтында орналастырылды.
Заң жобасы агломерацияларды дамытуды кешенді құқықтық реттеуді және «Агломерацияны дамыту туралы» заңды іске асыруды қамтамасыз етуге бағытталған, оның ішінде:
- агломерацияларды жоспарлауды, үйлестіруді және қаржыландыруды жетілдіруге бағытталған құқықтық және нормативтік реформалар арқылы агломерацияларды дамытудың тиімділігін арттыру;
- агломерацияларды дамытуға жәрдемдесу мақсатында қала құрылысы/экономикалық интеграция процесі мен әкімшілік шекаралар, сондай-ақ өкілеттіктер арасындағы сәйкессіздікті жою;
- агломерацияларды дамытуда жергілікті атқарушы органдар арасындағы үйлестіруді және өзара іс-қимылды жетілдіру.
Ұлттық экономика министрлігінің мәліметінше, ел халқының 36 проценті орталықтары Нұр-Сұлтан, Алматы, Шымкент және Ақтөбе қалаларында орналасқан төрт агломерацияда тұрады. Агломерация орталықтары елдің жалпы ішкі өнімінің үштен бір бөлігін құрайды. Агломерациялар елге тартылған шетелдік инвестициялардың 60%-тен астамын құрайды.