«Заң және тәртіп» тақырыбындағы мақалалар байқауына қатысу

Қазақстан Республикасындағы сыбайлас жемқорлыққа қарсы саясат мемлекеттік органдардағы және мемлекеттік қызметтегі сыбайлас жемқорлықпен күресуге бағытталған. Ол сыбайлас жемқорлыққа қарсы мәдениетті қалыптастыру, заңнаманы жетілдіру, мемлекеттік қызметшілердің жауапкершілігін арттыру, сондай-ақ қоғамдық бақылау мен алдын алу шараларын күшейтуді қамтиды.

Ағымдағы жылы Көкшетау қаласы әкімдігінің «Экономика және қаржы бөлімі» мемлекеттік мекемесінің бюджетті жоспарлау және орындау секторының бас маманы Апиева Еркежан Елемесқызы Ақмола облысы бойынша Сыбайлас жемқорлыққа қарсы іс-қимыл агенттігінің департаменті ұйымдастырған «Заң және тәртіп» тақырыбындағы мақала байқауына белсенді қатысып, өзінің кәсіби және азаматтық ұстанымын көрсетті.

Байқау қорытындысы бойынша Еркежан Елемесқызының «Заң және тәртіп – сенімнің, дамудың және әділеттіліктің негізі» атты мақаласы бірінші орынды иеленді. Бұл жетістік - көтерілген мәселелердің өзектілігі, ой-пікірлердің жүйелілігі, мазмұнның тереңдігі мен азаматтық ұстанымының айқын көрініс табуының нәтижесі.

Автор өз жұмысында заң үстемдігін қамтамасыз етуде, құқықтық мәдениетті қалыптастыруда және қоғам мен мемлекеттік органдар арасындағы сенімді нығайтуда мемлекеттік қызметшілердің маңызды рөлін ерекше атап өтеді.

Мақалада сыбайлас жемқорлыққа қарсы саясат, жеке жауапкершілік, қызметтік әдеп және мемлекеттік органдардың ашықтығы мәселелеріне айрықша назар аударылған. Еркежан Елемесқызы бұл ұғымдарды өзінің кәсіби тәжірибесі мен қызметтік практикасы арқылы негіздеп, заңдылық пен әділеттілік қағидаттарын сақтау мемлекеттік басқарудың тиімділігі мен азаматтардың өмір сапасына қалай әсер ететінін дәлелді түрде баяндайды.

Байқаудағы жеңісі үшін Еркежан Елемесқызы Ақмола облысы бойынша департамент басшысы, генерал-майор А. Оразханның қолынан дипломмен және 100 000 теңге көлеміндегі сертификатпен марапатталды.

Бұл жетістік - кәсіби біліктіліктің жоғары деңгейін, белсенді азаматтық көзқарасты және үнемі даму жолындағы ұмтылысты айқын көрсетеді. Әріптесіміздің бұл табысына шын жүректен қуанып, оны лайықты жеңісімен құттықтаймыз!

Жаңа жетістіктер, шабыт және кәсіби әрі қоғамдық қызметте толағай табыстар тілейміз!