Астанада елорда мен оған іргелес өңірде экопарктер құру мәселесі

Бүгін Қазақстан Республикасының Экология және табиғи ресурстар министрі Е.Нысанбаев Астанада елорда мен оған іргелес өңірде экопарктерді ұйымдастыру мәселелеріне арналған кеңеске қатысты. Кеңеске Астана қаласының әкімі Ж. Қасымбек, Ақмола облысының әкімі М. Ахметжанов, мемлекеттік органдардың өкілдері және басқалар қатысты.

«Мемлекет Басшысының 2025 жылғы 24 желтоқсандағы Астана қаласын дамыту мәселелері жөніндегі кеңесте мегаполистердің және облыс орталықтарының қала маңындағы аймақтарында эко-парктер құру қажеттілігіне қатысты тапсырмасын орындау мақсатында Министрлік экологиялық парктер (эко-парктер) құрудың, дамытудың және пайдаланудың ұсынылатын стандарттарын жұмыста қолдану үшін облыстардың, республикалық маңызы бар қалалардың әкімдіктеріне әзірлеп, әкімдіктерге жолдады» деп, өз сөзінде Е. Нысанбаев атап өтті.

Эко-саябақтар табиғи ландшафттарға, жергілікті өсімдіктерге және жұмсақ рекреацияға басымдық беретін ең аз араласу принциптеріне сәйкес келуі керек, ал барлық инфрақұрылым – соқпақтар, жарықтандыру, демалыс аймақтары және санитарлық тораптар – қаланың ұзақ мерзімді тұрақты дамуының бөлігі ретінде кейіннен басқару және тұрақты экологиялық мониторингпен қатаң қажетті көлемде және экологиялық орындауда құрылады.

Қазіргі уақытта Министрлік елорда маңында эко-парктер құру үшін 5 жер учаскесін ұсынады:

1) Үркер кентінен айналма жол бойындағы Қарқаралы тас жолына дейінгі веложол – шамамен ауданы 200 га (қала шегі);

2)  Қызылсуат ауылы ауданында – 124 га (радиусы 10 км дейін);

3)  Сарыоба көлі ауданында – 259 га (30 км дейінгі радиуста);

4)  Астана – Қорғалжын автомобиль жолының бойында – 303 га (20 км дейінгі радиуста);

5) Астана – Қорғалжын автомобиль жолының бойында-197 га (30 км дейінгі радиуста).

Астананың 2035 жылға дейінгі бекітілген Бас жоспарында елорда аумағының жартысынан астамын көгалдандыру көзделген: бұл қаланың жалпы аумағы 79,7 мың гектардың 42 мың гектарын құрайды. Соңғы жылдары елордада жасыл желектерді отырғызу жұмыстары белсенді жүргізіліп, парк кластерлері қалыптасуда.