Экология және табиғи ресурстар министрлігі ШҚО-да тексеруді тағайындады

Қазақстан Республикасының Экология және табиғи ресурстар министрі Е. Нысанбаев Өскемен қаласындағы Өскемен титан-магний комбинатының (бұдан әрі – «ӨҚ ТМК» АҚ) аумағынан ластаушы заттардың рұқсат етілмеген шығарындыларымен байланысты резонанстық жағдайға байланысты жұмыс сапарымен Шығыс Қазақстан облысына барды.

Сапар барысында министр «ӨҚ ТМК» АҚ кәсіпорнына барып, болған оқиғаның мән-жайымен танысты, сондай-ақ компания басшылығымен және жергілікті билік өкілдерімен кездесті.

Шығыс Қазақстан облысы бойынша экология департаменті экологиялық нормалардың сақталуын бағалау және ықтимал бұзушылықтарды анықтау үшін «ӨҚ ТМК» АҚ-ға қатысты жоспардан тыс тексеруге бастамашы болды. Тексеру аймақ экологиясының жағдайына әсер етуі мүмкін кәсіпорын қызметінің барлық аспектілерін қамтиды.

Экология министрі оқиғаның ауырлығын атап өтіп, келесі тапсырмаларды берді:

- Экологиялық стандарттардың бұзылуына байланысты кәсіпорынның әрекеттерінің (немесе әрекетсіздігінің) заңдылығын бағалау, сондай-ақ болған оқиғаға құқықтық бағалау жүргізу.

- Қолданыстағы заңнама шеңберінде барлық қажетті ықпал ету шараларын, соның ішінде лауазымды тұлғаларды және жалпы кәсіпорынды жауапкершілікке тартуды қабылдау.

- Болашақта осындай оқиғалардың алдын алу үшін шұғыл шаралар қабылдау, оның ішінде өңірдің басқа объектілерінде экологиялық талаптардың сақталуын бақылауды күшейту.

Тексеру нәтижелері туралы қосымша хабарланатын болады.