Республика күніне арналған салтанатты іс-шара өтті

2025 жылғы 24 қазанда мемлекеттік мереке — Республика күніне орай Астана қаласы бойынша Қылмыстық-атқару жүйесі департаментінде салтанатты іс-шара ұйымдастырылды.

Қонақтар мен жеке құрам алдында құттықтау сөз сөйлеген департамент бастығының міндетін уақытша атқарушы, әділет полковнигі  Ирсали Ирисдавлетұлы Ахмедов қызметкерлерге адалдығы, кәсібилігі және құқықтық тәртіпті қамтамасыз етуге қосқан үлесі үшін алғыс білдіріп, бұл мерекенің мемлекеттілік пен ұлттық бірліктің нышаны ретіндегі маңыздылығын атап өтті.

Іс-шара барысында өз міндеттерін адал атқарған, бастамашылдығы мен жоғары тәртібімен ерекшеленген қызметкерлерге құрмет грамоталары, медальдар мен алғыс хаттар табысталды.

Сондай-ақ жас ұрпақты тәрбиелеуге қосқан үлесі мен ұжым өміріне белсенді араласқаны үшін ардагерлер, қызметкерлердің ата-аналары мен жұбайларына да марапаттар тапсырылды.

Мерекені біздің талантты қызметкерлеріміз сәндеді: түрлі әндер орындалып, домбырамен өнер көрсетілді, сондай-ақ №58 мектеп-гимназиясының «Жас сақшы» тобының қатысуымен хор орындады.