Абай облысы бойынша ҚАЖ әйелдер колониясының қызметкерлері Павлодар тұрғынының үйлеріне аман-есен оралуына көмектесті.
Абай облысы бойынша Қылмыстық-атқару жүйесіне қарасты әйелдер колониясының қызметкерлері Павлодар қаласының тұрғыны мен оның кәмелетке толмаған ұлына көмек көрсетті. Олар жұбайымен ұзақ мерзімді кездесуден кейін қар құрсауында қалып қойған.
Ауа райының күрт нашарлауына байланысты олардың автокөлігі толықтай қар астында қалып, отбасы өз бетінше жолын жалғастыра алмаған.
52 жастағы ер адам 15 жастағы ұлымен бірге жазасын өтеп жатқан жұбайымен кездесу үшін мекемеге келген. Олардың Шуақ ауылында ұзақ мерзімді кездесуде болған кезінде ауа райы күрт өзгеріп, қатты жел тұрып, мол қар жауған. Соның салдарынан отбасының көлігі қалың қардың астында қалып, қозғала алмай қалған.
Үйінен жырақта қиын жағдайға тап болған әке мен бала жолға шыға алмай, айтарлықтай қиындық көрген. Осы сәтте қызметте болған мекеме қызметкерлері жағдайды байқап, дереу көмекке келген. Олар өз күштерімен және қызметтік техниканың көмегімен қар үйінділерін тазалап, автокөлікті қар құрсауынан шығарып, жолды қауіпсіз жалғастыруға мүмкіндік жасаған.
Қызметкерлердің жедел әрі үйлесімді әрекеттерінің арқасында отбасы аман-есен жолға шығып, Павлодар қаласына кері оралған.
– Біз ұлыммен өте қиын жағдайға тап болдық — көлігіміз толықтай қар астында қалды, айналада боран соғып тұрды, жол көрінбеді деуге болады. Шынымды айтсам, не істерімді білмей, абдырап қалдым. Дәл сол сәтте колония қызметкерлері көмекке келді. Олар тек өз міндеттерін орындап қана қоймай, шынайы адамгершілік танытты. Мұндай қиын сәтте жанымыздан табылған жандардың бейжай қарамағаны мен үшін өте маңызды болды. Бізге қауіпсіз түрде үйге оралуға көмектескен әрбір қызметкерге шын жүректен алғыс айтамын, – деді Павлодар қаласының тұрғыны.
– Біздің қызметкерлер қандай жағдай болмасын адамдарға көмек көрсетуге әрдайым дайын. Бұл жерде тек қызметтік міндет қана емес, адамгершілік жауапкершілік, қамқорлық пен қолдау туралы сөз болып отыр. Біз ұжымымыздың жеделдік танытып, бірлік көрсетіп, қиын жағдайда қалған адамдарды назардан тыс қалдырмағанын мақтан тұтамыз, – деп атап өтті мекеме бастығы Уалихан Жұмашев.
Мұндай оқиғалар қылмыстық-атқару жүйесі қызметкерлерінің тек тәртіп пен қауіпсіздікті қамтамасыз етіп қана қоймай, сонымен қатар жоғары адамгершілік қасиеттерін көрсетіп, азаматтарға күрделі өмірлік жағдайларда көмек көрсететінін тағы да дәлелдейді.