Жауапты қызмет — жасақ бастығы

Қылмыстық-атқару жүйесіндегі әрбір лауазымның ел қауіпсіздігі мен құқықтық тәртіпті қамтамасыз етудегі орны айрықша. Солардың ішінде тікелей адам тағдырымен жұмыс істейтін, психологиялық тұрғыдан ең күрделі әрі жауапты бағыттардың бірі — жасақ бастығының қызметі.

Бүгінде Маңғыстау облысы бойынша ҚАЖД №43 мекемесінде әділет капитаны Ақпанбет Азатбек Болатбекұлы жасақ бастығы лауазымында абыройлы қызмет атқарып келеді. Ол арнайы контингент арасында тәрбиелік және әлеуметтік-психологиялық жұмыстарды жүйелі ұйымдастыруға жауапты.

Офицердің күнделікті қызметі тек бақылаумен ғана шектелмейді. Бұл — сотталған азаматтардың санасын өзгертуге, олардың қателігін түсінуіне ықпал ететін үлкен жауапкершілік. Жасақ бастығының негегізгі міндеттеріне мыналар кіреді:

• Арнайы контингенттің бекітілген күн тәртібін қатаң сақтауын қадағалау;

• Мекеме аумағында темірдей тәртіп пен қауіпсіздікті қамтамасыз ету;

• Сотталғандарды құқықтық тұрғыдан қайта әлеуметтендіру және бейімдеу жұмыстарын жүргізу;

• Тұрақты түрде құқықтық түсіндіру және мәдени-тәрбиелік іс-шаралар өткізу;

• Мекеме ішіндегі ішкі тұрақтылықты сақтау.

«Жасақ бастығы — тек қадағалаушы ғана емес. Ол — ең алдымен заң мен тәртіптің үлгісі, сотталғандарға дұрыс бағыт беруші және түзету процесінің негізгі ұйымдастырушысы», — дейді әріптестері.

Аталған қызметтің түпкілікті әрі басты мақсаты — жазасын өтеуші азаматтарды босап шыққаннан кейін қоғамға пайдалы тұлға ретінде қайта бейімдеп, заңға бағынатын жаңа өмірге жол ашу болып табылады.