Ақтауда Кітап мерекесі аталып өтті

23 сәуір – Ұлттық кітап күні және Кітапханашылар күніне орай Ақтау қаласындағы Қабиболла Сыдиықов атындағы облыстық әмбебап ғылыми кітапханасында «Ашық есік күні» ұйымдастырылды.

Іс-шараға Маңғыстау облысы бойынша ҚАЖД және №43 мекеме қызметкерлері қатысты. Жиын кітап сүйер қауымды бір алаңға біріктіріп, рухани құндылықтарды насихаттауға бағытталды.

Қызметкерлер кітапхананың заманауи қызмет түрлері мен жаңа жобаларымен танысты. Сондай-ақ, интеллектуалдық және QUIZ форматындағы интерактивті ойындар өткізіліп, қатысушылардың білім деңгейі мен логикалық ойлау қабілеті сынға түсті.

Мерекелік кездесуде қызметкерлер өңірдің ақын-жазушыларымен жүздесіп, еркін форматта сұхбаттасты.

Қорытындысы қарапайым: кітап – тек ақпарат емес, ол ойды өсіретін, көзқарасты кеңейтетін құрал.