АСТАНАДА ҚР ДЕНСАУЛЫҚ САҚТАУ МИНИСТРЛІГІ МЕН ШВЕЦИЯ ЕЛШІЛІГІНІҢ ҚАТЫСУЫМЕН ДӨҢГЕЛЕК ҮСТЕЛ ӨТТІ

Астанада Қазақстан Республикасы Денсаулық сақтау министрлігі (ҚР) мен Қазақстандағы Швеция елшілігі өкілдерінің қатысуымен "Денсаулық сақтаудың болашағы: Швеция мен Қазақстанның денсаулық сақтау жүйесін басқару бойынша тәжірибе алмасу" тақырыбына арналған дөңгелек үстел өтті.
Іс-шараны Швеция Елшілігі мен Швецияның Business Sweden сауда және инвестициялық кеңесі Британдық-шведтік "АстраЗенека" биофармацевтикалық компаниясының қолдауымен ұйымдастырды.
Дөңгелек үстелдің мақсаты Қазақстан мен Швецияның соңғы онжылдықтардағы денсаулықты сақтаудың негізгі бағыттары бойынша жинақтаған тәжірибесі мен білімін екіжақты алмасу болды.
Екі ел де денсаулық сақтау қажеттіліктері мен инновациялық емдеу әдістерінің өсіп келе жатқан құны мен күрделілігі арасындағы тепе-теңдікті орнатуда, сондай-ақ пациенттердің өзекті қажеттіліктеріне жауап беретін инновациялық медициналық технологияларды қолдану арқылы шешімдер табуда ұқсас қиындықтарға тап болады.
Ұйымдастырушылар іскерлік өзара іс-қимыл және инвесторлар үшін екі елдің мүмкіндіктерін көрсету мақсатында осындай іс-шараларды жыл сайын өткізуді жоспарлап отыр.
Швеция қазірдің өзінде Қазақстанның медицина және цифрлық денсаулық сақтау саласындағы жобаларына қатысуда, атап айтқанда, осы жылдың ақпан айында ҚР Денсаулық сақтау министрлігі мен "АстраЗенека" компаниясының арасында фармацевтика және денсаулық сақтау саласындағы ұзақ мерзімді ынтымақтастық туралы меморандумға қол қойылды. Осылайша, Швед бизнесі жергілікті фармацевтика саласына инвестор болады.
Дөңгелек үстел Қазақстанның жоғары лауазымды делегациясының Швецияға цифрлық және ауылдық денсаулық сақтау жөніндегі апталық бағдарламаға қатысу үшін келешектегі сапарының негізін қалады. Іс-шара ағымдағы жылдың соңында Дүниежүзілік денсаулық сақтау ұйымы (ДДҰ) мен Швеция Үкіметінің қолдауымен өтеді. Қазақстан Швецияда денсаулық сақтау саласында тәжірибе алмасу бағдарламасына қатысу үшін ДДҰ шақырған алғашқы елдердің бірі болады. Іс-шараны Қазақстанның Денсаулық сақтау вице-министрі Бейбіт Есенбаев, Швецияның Қазақстандағы елшісі Ева Пулано және ДДҰ-ның Қазақстандағы өкілдігінің басшысы доктор Скендер Сила ашты.
Сондай-ақ, қонақтарға ғылым кандидаты, Еуразия бойынша директор, Business Sweden Маттиас Линдгрен кіріспе сөз сөйледі.
Дөңгелек үстелде Швецияның Денсаулық сақтау және әлеуметтік қамтамасыз ету мәселелері жөніндегі ұлттық кеңесінің Қоғамдық денсаулық сақтау мәселелері жөніндегі аға кеңесшісі Айрин Нильсон-Карлссон баяндама жасады, содан кейін денсаулық сақтаудың бас қазақстандық реттеушілері - Денсаулық сақтау министрлігі, Фармацевтикалық және медициналық бақылау комитеті және Дәрілік заттар мен медициналық бұйымдарды сараптау ұлттық орталығы өкілдерінің қатысуымен ашық пікірталас өтті. Талқылауға Қазақстанның басқа да реттеуші мемлекеттік органдарының өкілдері және Швеция мен Қазақстанның фармацевтика өнеркәсібі мен денсаулық сақтау секторының сарапшылары қатысты.
Кездесу өмірді сақтайтын инновациялық дәрі-дәрмектерді әзірлеуде бір ғасырдан астам тәжірибесі бар және швед инновацияларының тарихында терең тамыр жайған "АстраЗенека" халықаралық биофармацевтикалық компаниясының қолдауымен өтті.