МЕДИЦИНАДАҒЫ 30 ЖЫЛ: ЖҮРЕКПЕН ТАҢДАЛҒАН ДӘРІГЕР ЖОЛЫ
Денсаулық сақтау жүйесінде 30 жыл еңбек еткен, Кардиология және ішкі аурулар ғылыми-зерттеу институтының Консультациялық-диагностикалық орталығының жоғары санаттағы кардиолог дәрігері, медицина ғылымдарының кандидаты Ботагөз Жұмабекқызы Қыстаубаеваның еңбек кітапшасында бар болғаны екі жазба ғана бар.
Олар — Алматы қалалық №2 емханасы және Кардиология және ішкі аурулар ғылыми-зерттеу институты.
Бұл жай ғана тұрақтылық емес, бұл – мамандыққа және пациенттерге деген адалдықтың айқын көрінісі.
Медицинаға деген жолы бала кезден басталған. Бірде педиатрдың қабылдауына келген кішкентай Ботагөз балаларды жылылықпен, қамқорлықпен қабылдап жатқан дәрігерді көреді.
Дәл сол сәтте ол: адамдарды емдейтін дәрігер боламын деп шешім қабылдайды.
Мектепті күміс медальмен аяқтаған соң, Алматы мемлекеттік медицина институтына (қазіргі — С. Асфендияров атындағы ҚазҰМУ) оқуға түседі.
Еңбек жолын 1997 жылы Алматы қалалық №2 емханасында терапевт болып бастап, онда 6 жыл жұмыс істейді.
Кейін Кардиология және ішкі аурулар ғылыми-зерттеу институтында аспирантурада оқып, сол жерде қызметін жалғастыруға ұсыныс алады. Содан бері 23 жылдан астам уақыт бойы институтта жұмыс істеп, пациенттерге ең күрделі жүрек-қан тамырлары ауруларымен күресуге көмектесіп келеді.
«Дәрігер – бұл жай ғана мамандық емес. Бұл – жауапкершілік, жанашырлық және көмектесуге деген ниет. Біз, кардиологтар, бұл жауапкершілікті ерекше сезінеміз, өйткені сөз ең маңызды ағза туралы болып отыр», – дейді Ботагөз Жұмабекқызы.
Бүгінде институттың Консультациялық-диагностикалық орталығы еліміздің түкпір-түкпірінен және шетелден келген пациенттерді қабылдайды. Тек 2025 жылдың өзінде мұнда 15 мыңға жуық адамға медициналық көмек көрсетілген.
Өтініштердің артуы – заманауи диагностиканың дамуы мен жоғары технологиялық медициналық көмекке қолжетімділіктің кеңеюінің нәтижесі.
«Адам өмірінен қымбат ештеңе жоқ. Маған адамдарға толыққанды өмір сүруге көмектесу, оларға үміт сыйлау ұнайды. Ал пациенттердің алғысы – ең жоғары марапат», – деп бөліседі ол.
Ботагөз Жұмабекқызының тарихы – бір кездері медицинаны таңдап, сол таңдауға өмір бойы адал болып келе жатқан дәрігердің тағдыры.