ҚАЗАҚСТАН ТМД ДЕНСАУЛЫҚ САҚТАУ КЕҢЕСІНДЕ БІРҚАТАР МАҢЫЗДЫ БАСТАМАЛАРДЫ ҰСЫНДЫ
Душанбеде ТМД-ға мүше мемлекеттердің денсаулық сақтау саласындағы ынтымақтастық жөніндегі Кеңесінің XXXVIII отырысы өтті. Іс-шараға ДДСҰ Еуропалық өңірлік бюросының директоры Ханс Клюге, сондай-ақ Қазақстан делегациясы құрамында денсаулық сақтау министрі Ақмарал Әлназарова қатысты.
Форумға ТМД елдерінің бейінді ведомстволар басшылары мен жетекші сарапшылар жиналып, ынтымақтастықтың негізгі бағыттарын талқылады.
Кеңес күн тәртібінде өңірлік интеграция мәселелері қаралды. Қазақстан тарапы бірқатар бастамаларды ұсынып, оларды ынтымақтастықты нығайтуға бағыттады. Атап айтқанда:
- алғашқы медициналық-санитарлық көмектің (АМСК) рөлін күшейту;
- ТМД елдерінің күш-жігерін АМСК жөніндегі Ғаламдық коалиция аясында біріктіру;
- денсаулық сақтау саласына цифрлық шешімдер мен жасанды интеллект технологияларын енгізу.
Сонымен қатар, Қазақстан Ұлттық денсаулық сақтауды дамыту ғылыми орталығын (ҰДСДҒО) ТМД бойынша АМСК мәселелері жөніндегі базалық ұйым ретінде айқындауды ұсынды. Бұл бастамалар қатысушылардың қолдауына ие болып, Кеңестің алдағы бірлескен іс-қимыл жоспарына енгізілді.
Кездесу барысында Орталық Азиядағы ынтымақтастықты дамыту жөніндегі Жол картасы талқыланды. Ол ДДСҰ Еуропалық өңірлік бюросының қолдауымен жүзеге асырылмақ және алғашқы медициналық-санитарлық көмекті жаңғыртуды, денсаулық сақтауды цифрландыруды және медицина кадрларын даярлауды қамтиды.
Қазақстан мен Тәжікстан денсаулық сақтау министрлері ұзақ мерзімді әріптестіктің жаңа мүмкіндіктерін ашатын меморандумға қол қойды.
2026–2027 жылдарға арналған бірлескен іс-қимыл жоспарына сәйкес:
- денсаулық сақтау саласындағы ведомствоаралық келісім әзірленеді;
- 2025 жылы Тәжікстанда Қазақстан медицинасы күндері, 2026 жылы Қазақстанда Тәжікстан медицинасы күндері өтеді;
- медицина студенттерімен алмасу бағдарламалары, мамандардың біліктілігін арттыру курстары іске асады;
- Алматы облысындағы ДДСҰ-ның АМСК жөніндегі демонстрациялық алаңы қолданылады;
- АМСК жөніндегі Ғаламдық коалиция аясында бірлескен жұмыс жүргізіледі.
Сондай-ақ отырыста 2026 жылы ТМД-да Денсаулықты қорғау жылын өткізуге дайындық, 2024–2025 жылдарға арналған «Халық денсаулығы» стратегиясын жүзеге асыру бойынша үйлестіру, туберкулездің алдын алу, Тәжікстанмен онкология, кардиология және инфекциялық бақылау салаларындағы ортақ жобаларды дамыту, сондай-ақ созылмалы аурулардың алдын алу мен төтенше жағдайларға ден қою мәселелерінде ДДСҰ Еуропалық өңірлік бюросымен серіктестікті кеңейту талқыланды.
ТМД Денсаулық сақтау саласындағы ынтымақтастық жөніндегі Кеңесінің келесі отырысы 2026 жылы өтеді.